Man United beisei awmchhun Europa League

Ruben Amorim enkawl Manchester United hian tun season atan nomawi pakhat an la beisei thei, a hming chu 'Europa League' a ni. zanin dar 11:15 hian last 16 first leg khel turin Real Sociedad an lenchilh ang.

Man United hi League Cup leh FA Cup aṭangin an tla fel tawh - Premier League nomawi chu an tan sawi ngam chi a ni tawh lo, tunah chuan 14-na niin hmahruaitu Liverpool point hmuh zatve pawh an hmu phak lo!

Portuguese manager Amorim hian tun season chhungin nomawi engmah chawi lo pawh ni se an ban a rinawm loh, mahse an boruak hniam tak tih kan a harsat phah ang; boruak siam nung tur chuan Europa League hi a pawimawh hle.

Man United thuneitu lam khan hun harsa an tawh lai pawh khan, coach Erik ten Hag an thlawp thu an sawi ri fo a, tun dinhmunah erawh Amorim chungchangah thawm an nei lo, thla nga chauh a la nih avangin ngai an ti lo pawh a ni mai thei.

Inelna danga an chet fuh loh lai pawhin Amorim-a leh a naute hian Europa League an khel ṭha ṭhin viau thung. An hlawhtling thei hlauh a nih chuan sum leh pai mai bakah an rilru thlenga nghawng thei tur a ni dawn, fans lungawi lohna an thawi dam thei deuh bawk ang.

FA Cup-a Fulham an hneh loh ṭumin, defender Harry Maguire chuan hliam tenau a tuar, ani bakah hian Matthijs de Ligt pawh a dar a hlian - defender pawimawh pahnih te hi nimin tlai thleng kha chuan an dinhmun ngaihchan a la ni, an inlan theih erawh a beisei awm.

Man Unied damdawi in a lun rih hle a, hliam vangin Altay Bayindir, Tom Heaton, Jonny Evans, Lisandro Martinez, Luke Shaw, Toby Collyer, Kobbie Mainoo, Mason Mount leh Amad te an chawl mek, coach tan pawha luhaina tham a ni ang. Hei bakah rawlthar duhawm Chido Obi-Martin chu Europa League khel tura an ziahluh loh avangin a khel thei lo bawk.

Erik ten Hag-a'n a kaihhruai lai khan, Europa League an match hmasa pathumah an khingpui te nen vawi thum an inhnehtawk, mahse a hnu lamah a zawna vawi nga chakin playoff khelh ngai loin last last 16 hi an lut, pathumna an ni phak hial.

Man United khingpui tur Real Sociedad erawh 13-na niin playoff an khel a, an khingpui Midtjylland erawh 7-3 ngawtin an sawp thei, league round an khelh laiin Ajax, Dynamo Kyiv leh PAOK te an hneh theih bawk avangin United hi an huphurh hran lo ang.

Spanish team hi Barcelona laka mualpho hlim an ni a, La Liga lama an result ṭha lo thawi dam tur leh nomawi an beisei mek um zel tur chuan United laka tlawm loh a pawimawh dawn, chak tuma an beih dawn avangin inkhel a hmuhnawm dawn.

Zanin dar 11:15 tho hian Tottenham chuan AZ Alkmaar an lenchilh ang - Dutch club hi an player neih dan chhut chuan Spurs aia team nem zawk tura ngaih an ni, mahse European football a nih tawh chuan a boruak a danglam ṭhin a, sawi lawk a harsa.

Ange Postecoglou enkawl Tottenham tan pawh Europa League hi kumina a beisei awmchhun a ni tawh a, manager Postecoglou-a'n a hna ngai a chelh chhunzawm zel theih nan leh, season an hman chhiat lutuk khuh mawi nan an champion chiah loh a nih pawhin thlen san a pawimawh hle.