Palmer a khel dawn em?

Europa Conference League last 16 chu zaninah khelh a ni dawn a, Premier League club Chelsea-in zanin dar 11:15 hian Parken-ah Copenhagen an hmachhawn dawn. Enzo Maresca hote hi team 16 zingah langsar mah se Fiorentina bakah Antony telna Real Betis te pawh an la dam tih hriat a ṭha.

Blues hi league round-ah pakhatna an ni a, match rukah an chak fai vek. Maresca-a'n Conference League-ah Premier League-a a chhawr ngun player a dah ṭha ṭhin a, Cole Palmer pawh match rukah hian a inlan miah lo. Chutihrualin Chelsea-in playoff round-a Switzerland club Servette an hmachhawn ṭumin bench aṭangin Palmer hi a lut a, nikum August thla daih tawh kha a ni.

Tunah erawh Chelsea-in Premier League nomawi an chawi a rinawm tawh lo a, FA Cup leh League Cup khelh tur an nei tawh lo. Blues nomawi beiseina neihchhun chu Conference League hi a ni a, Maresca pawhin a neih ṭhat ber a luhtir pawhin a mak lo ang.

Inkhel dangah Real Betis-in zanin dar 11:15 hian Portuguese club Vitoria de Guimaraes an hmachhawn dawn a, Spanish club hian kar tawp khan Real Madrid an hneh avangin inrintawkna an ngah khawp ang. Betis hi Manuel Pellegrini enkawl a ni a, Manchester United aṭanga loan hmanga an hawh Antony a chet ṭhat bawk avangin an phur lai tak a ni.

Conference League hi 2021–22 season aṭanga khelh ṭan a ni a, Jose Mourinho kaihhruai AS Roma chu champion hmasa ber niin West Ham United leh Olympiakos te an champion tawh bawk.