Emirates Cup champion Arsenal

Pathianni zan khan Emirates Cup 2015 chu khelh zawh a ni ta a, inelna buatsaihtu Arsenal chuan an khelmualah Theo Walcott goal khung hmangin Wolfsburg 1-0 in an hneh a, a vawi li nan an champion.

Kum 2007 aṭanga neih ṭan Emirates Cup khel tur hian kuminah Gunners bakah Villarreal, Wolfsburg leh Lyon te sawm an ni. Team tinte hian match hnih ṭheuh khelin point hmu sang ber an champion. Inkhel lehlamah Villareal chuan goal hnih faiin Lyon an hneh bawk.

Season thar atana inbuat­saih­naah Arsene Wenger a nau­te hian tun thla thar tir khan Singapore-ah Barclays Asia Trophy an lo chawi tawh bawk. Pathianni khian Wembley Stadium-ah Chelsea nen Community Shield an khel leh ang.

North London club hian an match hmasa zawkah Ligue 1 club Lyon chu 6-0 in an sawp a, an match hnuhnung zawkah erawh goal khat chauh an khung. Wenger-a'n an inkhelh hmasak ṭuma player 10 ngawt a thlak a, Mesut Ozil chiahin inkhel bul a ṭan nawn.

German Cup champion Wolfsburg hian Arsenal goal khung tur an dang rei thei hle a, mahse second half-a England international forward goal khung tur erawh an chelh zo lo. Walcott-a goal khung tur hi kum 17-a upa midfielder Jeff Reine-Adelaide siamsak a ni.

Chelsea aṭanga Gunners zawmtu goalkeeper Petr Cech-an Emirates Stadium-ah a game hmasa ber a khel a, a khel chhe lo. Cech hian Wolfsburg defensive midfielder Josuha Guilavogu-a goal shot ṭha tak chu a dan sak.

Kum 33-a upa Cech hian a club thar tan match hnih khel tawhin nomawi pahnih a chawi tawh a, friendly match a nih avangin sawi zui tlak nomawi a la lakpui lo. Community Shield-ah a Cech hian club hlui lakah hnehna an chang thei a nih chuan match thum a khelh aṭangin vawi thum lawmman a dawng ang.

Walcott hmalam hun

Chakna goal khungtu Wol­cott hian Gunners-ah kar khatah £100,000 hlawh mekin kum khat daih chiah contract a nei tawh a, tunah hian hun rei zawk cham turin inbiakna an nei mek.

A khup hliam vanga season hmasaa match 14 chiah khel thei Walcott hian Arsenal tan Premier League match 302 khel tawhin goal 76 a khung tawh.

French manager Wenger chuan, "Tunah chuan kan la ti fel lo deuh, mahse a fel thuai ang," tiin Walcott-a contract chungchang a sawi.

Arsenal tlar hma

Nipui transfer inhawn tirh khan Arsenal hi srtiker hrang hrang Real Madrid forward Karim Benzema, Manchester City striker Edin Dzeko leh Borussia Dortmund duhlai Pierre-Emerick Aubameyang te nen sawi zawm a ni. Mahse tunah chuan player lei nana sum nei Wenger-a'n a player neihsate a rintawk thu a sawi leh tawh.

French striker Olivier Giroud leh Danny Welbeck te hi an rinrawl tur an ni leh dawn a, mah se inhliam vangin England international hian season bul a ṭan thei lo ang. Arsenal striker ropui chawl ta Thierry Henry-a'n champion pui tham loh anga alo sawi tawh Giroud hi champion pui an tum dawn. Kum 28-a upa striker hian season hmasa khan Gunners tan Premier League match 21 khelin goal 14 a khung a ni.

Goal khung turin Arsenal hian Barcelona aṭanga an lak luh Alexis Sanchez an nei bawk, ani hian season hmasa khan Premier League-ah goal 16 a khung.

Season thar thilrin kum 65-a upa Wenger chuan, "Hetiang baka season thar inbuatsaih dan hi a awm chuang lo. Kan rilru leh taksa a hriselin an inpeih tawh hle a ni. Mahse, tunah hian a tak tak kan la thleng lo deuh. August 9-a West Ham nen kan inkhelh hunah engtiang chiah nge kan nih chu fiahin a awm ang," tiin a sawi.

Tute nge khel

Arsenal XI : Cech, Monreal, Paulista, Chambers, Bellerin, Ozil (Akpom - 45'), Arteta (Ramsey - 62'), Cazorla, Wilshere (Hayden - 75'), Reine-Adelaide (Oxlade-Chamberlain - 62'), Walcott (Giroud - 75').

Subs not used : Martinez, De­buchy, Metresacker, Ko­scielny, Coquelin, Iwobi.