Davis Cup-ah ranking a pawimawh lo - Bhambri
Kum 23-a upa India tennis star Yuki Bhambri chuan Davis Cup World Group playoff chungchang sawiin ram inelnaah ranking a pawimawh ber loh thu a sawi.
India hian 18-20 September, 2015 khian World Group playoff-ah seeded team Czech Republic an hmachhawn dawn a, an chak a nih chuan ram 16 telna 2016 Davis Cup World Group khel turin an tling ang.
World ranking 151-na Bhambri chuan, "India hmabak hi a awlsam dawn lo a, kan theihtawp chhuah hi kan tih theih chu a ni. Davis Cup-ah ranking a pawimawh loh tih kan hria a, upset thlentir kan tum ang," tiin a sawi.
India hian World Group playoff thleng turin New Zealand 3-2 in an hneh. Yuki Bhambri hian Michael Venus leh Jose Statham te a hneh a, a service vawi khat pawh a hloh lo.
India coach Zeeshan Ali chuan New Zealand hneh zawh khan Bhambri chu top 50 player ang maia a khelh thu a sawi.