United-ah Argentina no. 1
Manchester United chuan Sampdoria aṭangin free transfer-in goalkeeper Sergio Romero an la lut. Kum thum atan contract a ziak a, kum khat dang ziah belh theih dan a awm bawk.
Kum 28-a upa Romero hi season tawp rualin Sampdoria-a a contract a zo a, United hian Spanish goalkeeper Victor Valdes thlak nan an la lut. Barcelona keeper hlui Valdes hi Dutch manager Louis van Gaal-a'n a thu a zawm loh avangin club dang zawng turin a hrilh tawh.
Romero hian Dutch club AZ Alkmaar-ah kum 2007 leh 2009 chhung khan Van Gaal-a hnuaiah a lo khel tawh a, Argentine keeper hian Dutch club hi 2011 khan chhuahsanin Sampdoria a zawm.
Van Gaal chuan, "Sergio hi talent nei ṭha tak a ni a, kum 19 leka upa a nih laiin AZ Alkmaar tana khel turin ka thlang tawh a ni. Tuna ka hnuaia a khel leh thei tur hi ka lawm a ni. World Cup ṭha takin a khel a, kan squad ti chaktu a ni ang," tiin a keeper thar chungchang a sawi.
United keeper thar Romero chuan, "Manchester United ka zawm thei hi ka lawm hle a ni. Khawvel club lian bera ka khelh dawn avangin ka duhthusam a thleng dikah ka ngai. Van Gaal hi manager ṭha tak a ni a, a hnuaia season ṭan hi ka châk tawh a ni," tiin a sawi.
Manchester United manager Van Gaal hian David de Gea chu club chhuahsan lo turin a duh a, amaherawhchu transfer hun khar hma chu thleng thei lo a awm lo tiin a sawi. Chumi awmzia chu Romero hi second keeper ni loin season tharah United first keeper a ni thei tihna a ni.