Formula 1 Sebastian Vettel tak tak kan hmu leh ta
Pathianni khan Hungarian Grand Prix tlan a ni a, tun season-a a vawi hnih nan Ferrari driver Sebastian Vettel chuan hnehna a chang. Driver championship-a hmahruaitu Lewis Hamilton-a'n beisei phak loin paruknaah a thleng thung.
Tun season-ah Mercedes an chungnung takzet a, intlansiak vawi 10 awm tawh aṭangin vawi riat hnehna an chang tawh. Mahse Hungaroring tlankawngah erawh Mercedes driver-te'n Malaysian Grand Prix a hnehna lo chang tawhtu Vettel an tluk lo.
Kum 28-a upa Vettel hi intlansiak vawi 41-a hnehna a channa chiah a ni a, Ayrton Senna record a tluk chiah. Formula 1 driver zingah hnehna chang hnem ber pathumna ni chiahin Michael Schumacher (91) leh Alain Prost (51) te chiah amah aia record nei ṭha an awm.
Qualifying a cheṭha Mercedes an chetṭhat loh niah hian Red Bull driver Daniil Kvyat chuan a vawi khat nan podium lawnin phnihna a ni. Intlansiak bul ṭan fuh Vettel hian kawng kawi hmasa ber thlen hmain Mercedes car pahnih lehpelin a tawp thlengin a hawi kir tawh lo. Hetihlai hian a teammate Kimi Raikkonen erawh hybrid system failure vangin lap 55-na thleng bak a tlan thei lo.
British driver Hamilton chu lap khat pawh an tlan chuah hmain a che fuh lo a, kawng sira phaitualhnimah tlanchhuakin 11-naah a tlahniam hman; mahse a tawpah erawh a hma driver awm pali a tlanpel leh thung.
Bianchi tan an hlan
Ferrari team leh German driver Vettel chuan an hnehna chan chu nikum Japanese Grand Prix-a a chetsual vanga boral ta Jules Bianchi tan an hlan. Intlansiakna neih hma hian Bianchi sun nan driver ten an helmet dah khawmin minute khat chhung ngawi rengin an ding a ni.
World champion vawi li ni tawh Vettel chuan, "Jules tana kan thiltih theih sang ber chu amah hriat reng nana intlansiak kan hmachhawn hi a ni. Kan intlansiak chhung zawng khan kan thinlungah a awm reng a, hnehna kan chan pawh hi amah leh a chhungte tan kan hlan. Engtikah mah kan theihnghilh tawh lo ang," tiin Ferrari car khalh pui tura an hual driver boral ta tan a hnehna chan chu a hlan.