High Court-in Vijender Singh a knockout!

Punjab leh Haryana High Court chuan Zirtawpni khan professional boxing huang luhchilhtu Vijender Singh chu sorkar phalna la hmasa lova professional boxing a luhchilh dan chungchangah insawifiah turin thu a pe.

Court chuan Vijender Singh hi August 20 hma ngeia insawifiah turin a hriattir a ni.

Kum 29-a upa Vijender Singh hi Haryana Police-ah DSP in a thawk mek a, kum 2008 Beijing Olympics-a a champion khan tuna a rank-ah hian kaisan tir a ni. Sorkar hnathawk lai a nih avangin dan ang chuan Vijender hian hna dang a thawh phalsak a ni lo a, sorkar hriatpuina lo chuan sum hmuhna tur ang chi hlawkna lamah a inhnamhnawih phal a ni lo.

Kum 2009-a International Boxing Association (AIBA) middleweight ranking a no. 1 Vijender Singh a insawi­fiah nghal a, professional boxing luhchilh tura contract a la ziah loh thu a sawi.

Vijender Singh chuan, "Contract ka ziahna nia an sawi Queensberry Promotions-ah hian contract ka la ziak lo hrim hrim. Titi hona chu kan nei tawh ngei a, ka rilru te pawh ka hrilh tawh. Mahse, an sawi ang hian contract erawh ka la ziak lo. July 14 khan Delhi khawpuiah Queensberry Promotions hruaitute nen chanchinthar lakhawmtute kan kawm a, khami ṭuma ka thusawi pawh sorkar phalna ka lak hunah contract ka ziah tur thu a ni," tiin sorkar phalna la lova contract ziak anga court-in an puhna chu a pha nasa hle.

Feet 6-a sang Indian boxer chuan Olympic-ah vawi thum lai a inlan tawh avanga amateur huangchhuang chhuahsan a nih thu sawiin chona thar hmachhawn a duh thu a sawi.

Bollywood film-ah te pawh lo inlan zak zak tawh boxer chuan sum vanga professional huang chhung luhchilh a nih loh thu sawiin, "Tun hnaiah sum vanga professional boxing luhchilha puhna nasa tak ka tawng a, engineer leh doctor te pawn sum tamna an pan theih chuan infiammi ka nih vang ngawta ka pan theihlohna chhan tur a awm lo. Olympic medal lak aia sum tamna leh hmingṭhatna a awm lo bawk. Dik taka sawi chuan kan rama Olympic medallist sum lakluh zat hi professional boxing-a sum aiin a tam zawk a ni. Chu chuan pawisa vanga professional huangchhung luhchilh tur ka nih loh zia a tilang chiang hle a ni," a ti.

India-in boxer a neih tawh zinga thawm nei na ber ang hiala sawi Vijender chuan, "Kum 15 chhung India tan hian ka lo inkhel tawh a, ka medal hlawhchhuah zawng zawngte awrh tur khan theihtawp ka chhuah a ni. Professional ka nih angin India tan ka khel dawn a, world title hial ka la ta a nih pawn India tan a ni ang," tiin professional huang chhungah pawh India a dah pawimawh thu a sawi.

Vijender Singh chuan sawiselna nasa tak a tawh avanga a lawm loh thu sawiin, professional huang chhung a luhchilh vang maiin ṭhenkhat chuan thil ti sual thlirin an thlir nia a ngaih thu a sawi a ni.