PFA hotupa in a hlawh hnem

Professional Footba­llers’ Association (PFA) president Gordon Taylor chuan a hlawh hnem uchuak em avangin sawisel a hlawh mek.

Kum 70 a upa Bolton Wanderers player hlui hian nikum khan a hlawh a tisang vak a, nikuma a hlawh zat hi pound maktaduai 2 niin Premier League player vantlang aiin a hlawh hnem zawk.

British conservative party-a Commons cul­ture, media and sport commi­ttee hotupa Nigel Adams chuan, "Gordon-a hlawh zat hian football khawvelah ṭul loa sum hman a tam zia a tilang a ni. Player te thawhpui turin Premier League a striker ṭhenkhat hlawh zat a hlawh hi chu thil dik a ni thei lo," tiin Gordon Taylor chu a sawisel.

Kum 34 dawn deuh­thaw PFA hruaitu lo ni tawh Gordon hi khawvel football hruaitu zingah a hlawh hnem fal hle a, sum fai mai piah lama hamṭhatna a dawn zawng zawngte nen kumkhata a hlawh zat hi pound mak­taduai 3.4 vel nia chhut a ni.

Premier League-in 2013-14 leh 2015-16 sea­son chhung atan pound tluklehdingawn 3 Tv rights aṭanga an hmuh hnuin Gor­don a hlawh hian pun lam a pan thur thur a, 2016 aṭanga ṭan tura pound tluklehdingawn 5-a Premier League Tv rights-ah inremna siam ni lehin Gor­don-a hlawh hi a la pung dawn chauh niin a lang.

PFA sum lakluhna hnar ber hi Tv rights aṭanga chan an neih ve aṭangin a ni a, nikuma an sum lakluh zawng zawng pound maktaduai 22.5 aṭanga pound maktaduai 20 hi Tv rights aṭanga an lakluh a ni.