Tour de France champion Chris Froome

Team Sky rider Chris Froome chu Pathiannia neih zawh tak Tour de France-ah pakhatna a ni a, British cyclist zinga vawi hnih Tour de France-a champion thei hmasa ber a ni.

Froome hi 1985 khan Nairo­bi, Kenya-ah a piang a, a pa hi English a nih avangin Britain aiawhin a tlan. Kum 2009 aṭang khan tuna a telna Sky Team-ah hian a inziak lut.

Kum 30-a upa Froome hi Eddy Merckx-a'n kum 1970-a yellow leh polka dot jersey a dawn hnua dawng leh hmasa ber a ni. Yellow jersey hi inelna hmahruaituin an hak ṭhin a ni a, polka dot hi inelna hautaka an sawi tlang inelna bika pakhatna dawn ṭhin a ni.

Froome hi amah hnaih bertu Colombia rider Nairo Quintana-a'n second 72-in a pha lo.

Chet ṭhat vanga damdawi hman phal loh hmanga puh Froome chuan, "Ka tan chuan yellow jersey hi a hlu em em a, ka zah em avangin ka ti mualpho lo ang," tiin a sawi.

Tour de France hi thir­sakawr hmanga intlansiakna hautak zet mai a ni a, inelna hian thla khat dawn lai awhin 3,358.3 km zet an tlan ṭhin. Kumin inelna hi July 4 khan Utrecht, Netherlands aṭangin an ṭan a, hemi hnu hian Belgium tlawh lehin sana vir dan loh zawngin France ram an hel a, July 26, Pathianni khan inelna tawp nan Paris an thleng.