CONCACAF Gold Cup A vawi sarih nan Mexico an champion

Pathianni zan khan 2015 CON­CACAF Gold Cup final-ah Mexico chuan Jamaica 3-1 a hnehin a vawi sarih nan an champion.

Gold Cup hi North leh Central America bakah Caribbean ramte inelna niin kuminah hian ram 12-in an khel a; July 7 aṭanga July 26 chhungin United States leh Canada ten an inthlen ṭawm a ni.

Philadelphia, Lincoln Finan­cial Field-a inkhelah Mexico tan Andres Guardado bakah Jesus Corona leh Oribe Peralta ten goal khat an khung a; Jamaica tan hun tawp dawnah Darren Mattocks chuan goal khat a khung ve bawk. Jamaica hian semifinal-ah champion lai United States hnehin Caribbean ram zingah final lut hmasa ber ni mah se an tum ram an thleng zo ta lo a ni.

Goal hmahruai khungtu Mexi­co captain Andres Guar­dado hian tun tournament-ah match nga a khelh aṭangin goal ruk a khung. PSV midfielder Guardado hian quarterfinal-ah Costa Rica an hnehna goal awmchhun a khung bakah semifinal-ah Panama an hnehna goal khung bawkin Best Player atana thlan a ni nghe nghe.

Champion Mexico hi Russia-in a thlen tur 2017 Confederations Cup play-off atan an tling a; October 9 khian 2013 Gold Cup champion US nen an inkhel ang.

Mexico coach Miguel Her­rera chuan, "Kan lawm tak zet, inkhel kan thunun theih avangin hnehna kan chang a ni. Inelna hautak takah a chak ber kan ni thei hi ka naute ka chhuang hle. Kan thlen chin hi ṭha tawk hle mah se kan la duh tawk mai lo a, hmabak kan la nei. Tunah chuan October-a US nen kan inkhelh tur kan ngaihtuah leh ṭan nghal ang," tiin an champion zawhah a sawi.