Mizo coach 30 telna AIFF 'D' License course ṭan

All India Football Federation (AIFF) leh Mizoram Football Association (MFA) ṭangkawpin a buatsaih, AIFF 'D' License course chu nimin aṭangin Rajiv Gandhi Stadium, Mualpuiah ṭan a ni.

Ni nga chhung awh tur football coaching zirnaah hian mi 30-in an tel. Trainee te hi District FA aiawh, MPL club aiawhte, Aizawla Grassroots trainer-te leh dilna thehlut aanga thlante an ni.

He training course rawn buaipui tur hian AIFF chuan Meghalaya atangin Alison Kharsyntiew a rawn tir a, ani hi Shillong Lajong a thawk mek, 'B' License nei a nih bakah training course pe thei tura tling a ni. Mizo zingah 'D' license course conduct thei an la awm lo.

He training course hawngtu PC Vanlalhruaia, MFA Sr. vice president chuan 'D' License course hi hawngin trainee-te chu theihtawp chhuaha a tawp thlenga inthlahdah lo turin a chah.

Hawnna inkhawm kaihruaitu Lalnghing­lova Hmar, MFA honarary secretary chuan Mizo football coach-te tana remchanna inhawng hi tihtakzeta bei a, pass ngei tura la thutak turin trainee te a fuih a, 'D' license neih hnua kal zel a, 'A' license thlenga neih theih a nih thu te, chu chu a sum leh pai lam zawng tak pawha a hlawkzia, India ramah football coach-te an t zia te a sawi.

Alison Kharsyntiew hian zing lamah theory class lain chhunah practical a tihpui a, ni nga chhung ngawrh taka beiin Zirtawpni khian an zo fel dawn a ni.

Mizoram Football Association chuan kumin chhung hian Aizawlah 'C' License Course thlen leh tumin hma a la mek a; kum kal ta lamah khan Asian Football Confederation (AFC) 'B' License course te pawh Mizoramah hian nghah niin AFC aṭangin mithiam bikten India ram hrang hrang aṭanga coach thlan bikte chu thla khat chhung coaching an rawn pe tawh a ni.

AIFF chuan kalphung thar neiin AFC 'C' License coaching course bei turin AIFF 'D' License course kal lo chu an pawm tawh lo a ni.