Tualchhung football Biaktea thlak turin Sangbera kan nei - Maneiha

Tualchhung football tran­s­fer-a langsar ber chu I League khel tur Aizawl FC-in an elpui Mizo­ram Police FC aṭanga MPL3 top scorer Lalbiakhlua leh MPL1 best forward F. Lalrinpuia te an la lut hi a ni. Hemi chungchang hi sawiin Mizoram Police manager B. Lalneihsanga chuan an player ṭha an chan hi an tawrh bik a rin loh thu a sawi.

A hun laia Mizoram left back ṭha bera sawi ṭhin Ma­neiha chuan, "Practice kan nei ṭha a, kan neih ṭhat ber ṭum a ni hial ang. Mizo­ramah chuan player-te hi kan la inthlau lo a, Biaktea leh Valpuia-te chhuak hi chu kan ui lutuk a, mahse kan tuar bik lo ang. Season liam taah pawh khan Valpuia leh midfielder Ṭ-a te chu inhliam vangin kan chhawr lo reng alawm, chutichung chuan pathumna chu kan la ni," tiin an zam loh thu a sawi.

MPL4-ah semifinal-ah a awm dawn avangin MPL season thum chhunga palina hnuaia awm ngai lo Police hi season tharah dah hniam theih an ni lo.

Police manager chuan sawi chhun­zawmin, "Biaktea hi a tlan chak a, Mizoram pum huap ang chuan Sangbera hi amah aia tlan chak a ni. MPL3-a goal thum khungtu Sangbera hian Biaktea hmun ruak hi a luah zo ang," tiin Mizoram aiawha intlansiaka vawi eng emawzat tel tawh Sangbera a fak. Dawr­pui tlangval Sangbera hi 2012 MFA Cup-a SYS FC an champion ṭuma lone striker a ni a, a rintlak.

I Day Football sawii kaiin Maneiha chuan, "Dinthar FC, Chanmari FC leh Bethlehem VT FC te nen group khatah kan awm a, a harsa dawn khawp mai. Coaching staff an thawkrim a, player-te kan ringtawk a, result ṭha tak kan neih ka beisei. Training-naah Pu Dawnga (Commandant, 3rd MAP) leh a staff-ten min ṭawi-awm ṭha a, an chungah kan lawm hle," tiin a sawi.

Mizoram Police hian July 30 khian I Day Foot­ball-a an match hmasa berah Chanmari FC an hmachhawn ang.

Hmelma hmangaih!

Mizoram Police-in an player ṭhate I League Second Division khelin Chanmari FC lamah an lo kaltir tawh. Hei hi chu MPL khelh zawh tawh hnu a ni a, Mizo club inpuih tawnna ang deuh a ni - I League Second Division khelte hian club dang player an hawh fo tawh ṭhin.

Tuna Mizoram Police-in MPL aṭanga an player ṭha pahnih Aizawl FC-a an kaltir hi local football chanchin ngaihven deuh chuan mak an ti a, a ṭhen chuan âtthlak an tih thu an sawi. Aizawl FC hian kum 2016-ah I League hi an khel chauh dawn a, Police-in MPL aṭanga an player pahnih Aizawl FC-a an kaltir hian titi a titam hle.

Police tan erawh chona thar a ni a, player dang tan 'chance' a ni.