Goal khung thiam Arsenal

Inrinni zan khan Arsenal chuan an khelmual Emirates Stadium-ah an mikhual Lyon lakah ṭhat an chhuah lo a, 6-0 in an sawp. Inelna hi season thar atana inpuahchahna Emirates Cup a ni.

Kumin Emirates Cup khel turin Gun­ners-in Ligue 1 club Olympique Lyon­nais, Spanish club Villarreal leh Bun­desliga club Wolfsburg te an sawm. Team tin hian match hnih ṭheuh khelin a point hmu sang ber an champion ang.

Arsenal tan hian Olivier Giroud, Alex Oxlade-Chamberlain, Alex Iwobi, Aaron Ramsey, Mesut Ozil leh Santi Cazorla te chuan goal khat ṭheuh an khung. Inkhel lehlamah Villareal chuan 2-1 in Wolfsburg an hneh ve bawk.

Arsene Wenger-a'n keeper kum 22-a upa Damian Martinez chu inkhel bul ṭan tirin Chelsea aṭanga a lakluh thar goalkeeper Petr Cech chu bench-ah a ṭhuttir thung. Inkhelh banah French manager chuan veteran keeper Cech chu Pathianni zana Wolfsburg an khelh huna a luh tur thu a sawi.

Kum 65-a upa French manager Wenger chuan, "Goal ruk kan khung thei a nih chuan striker thar kan mamawh dawn chuang em ni? FA Cup final-ah goal li kan khung a, tunah goal ruk kan khung leh bawk. Tuna ka player neihte hi an ṭha tawk a ni. A bik takin kum 26-a upa Ozil hian season ṭha tak a hmang ngei ang tih ka ring," tiin a sawi. Striker thar lei tura an beisei hian lei a tum hmel lem lo hle.

Emirates Cup 2015-ah hian a chak team-in point thum an hmu a, goal khat zelah point khat an hmuh belh zel. Lyon hnehtu Arsenal hian an chak avangin point thum an hmu a, goal ruk an khung bawk avangin point kua an hmu tawh. Wolfsburg hnehtu Villareal chuan point nga an hmu ve bawk.

Nizan khan Lyon leh Villareal in­khelin, inelna buatsaihtu Arsenal leh Wolfsburg an inkhel bawk a, result erawh kan hre hman lo.

Tute nge ARSENal tana inlan?

Arsenal 6 - 0 Lyon

Arsenal : Giroud 29'; Oxlade-Cham­berlain 34'; Iwobi 36'; Ramsey 38'; Ozil 62'; Cazorla 85'.

Arsenal : Martinez, Debuchy, Mertesac­ker (c), Koscielny, Gibbs, Coq­uelin (Hayden 79'), Ram­sey (Arteta 63'), Oxlade-Cham­ber­lain (Reine-Adelaide 72'), Ozil (Cazorla 63'), Iwobi (Akpom 63'), Giroud (Walcott 72').

Subs not used: Cech (GK), Gabriel, Monreal, Chambers, Bellerin.