Tennis Australia laka hel Tomic

Australian tennis player Bernard Tomic chuan an ram tennis thuneitu sang Tennis Australia (TA)-in inbiak­puia an sawmna chu a hnawl.

Kum 22-a upa Tomic hi world number 29 niin Australia mipa player zingah chuan a tawng sang ber a ni mek. Mahse kumin Wimbledon third round-a Novak Djokovic a hneh loh hnuah Tennis Australia chu amah ngaihsak tawk loa puhin nasa takin a sawisel.

Heng thil thleng avang hian TA chuan an ram Davis Cup team aṭangin an paih chhuak hial. Kar hmasa mai pawh khan Miami Hotel-ah buaina a siam avangin Police-in an lo man tawh bawk. Hetiang a nih avang hian Tennis Australia leh Tomic inkar boruak hi a chhe hle.

Amaherawhchu, TA president Steve Healy chuan inremna siam tumin a duh a nih phawt chuan Tomic hi inbaiakna neihpui an duh thu leh Australia tana khel tura a kir leh theih tur thu tunkar tir khan a lo sawi tawh.

World number 29 Tomic chuan, "Ram tana khelh chu ka duh a, inbiakna neih pawh ka duh ngei. Mahse, tennis player naupang zawkte inzirna atana sum an hman hi inthliarna awm lo a an hman ka duh. Tun hmaa TA-in sum a sen ang kha ka unaunu Sara tan pawh hmang leh se ka duh," tiin a sawi.

June thla khan Tomic leh a unaunu kum 17-a upa Sara te hnena TA-in pawisa a pek ṭhin chu a ti tawp a, a chhan chu an pa James nena buaina an neih vang a ni.

Australia hian Davis Cup semi­final-ah November thla khian Great Britain an hmachhawn dawn a, he hun atan hian Tomic hi kir leh turin an duh a ni.