Mahni hmasial James Milner

Liverpool player thar James Milner chuan mahni hmasial vanga Anfield pan a nih thu a sawi.

Reds jersey number roh em em 7 ha tur Milner chuan, "Liverpool ka pan chhan hi chu mahni hma ka sial vang a ni. Manchester City-ah khan chuan position hrang hrangah min khelhtir ṭhin a, team aia pawimawh zawk an awm lo tih hi ka pawm dan a nih avangin lungawi takin ka khel mai ṭhin. Mahse, Liverpool-ah hi chuan duhna position taka khel turin ka lokal a, ka duhna taka ka khelh hian ka team tan ka thawhhlawk thei zawkin ka ring a ni. Field laiah ka khelh tawh dawn avangin ka ṭhat dan berin min hmu ang," a ti.

Liverpool-in pre-season tour an neih mekah Milner hi field laiah Reds captain thar Jordan Henderson nen an inkawp a, tun dinhmunah chuan an la inkawp fuh rih hle.

Player ngawichawi leh mahni hmasial lo tak anga an sawi ṭhin Milner chuan season thar thlir­lawk­­in, "Premier League hi chu eng team tan pawh a harsa vek a, champion nih hi thil har tak a ni. Mah­se, Liverpool hi club hlawhtling tak an lo ni tawh ṭhin a, an lo hlawhtlin tawhna ang kha neihlet pui leh ka duh a ni. He hmunah hian ka theihna zawng zawng pholan theih ka inbeisei a, hlawhtlinna tam tak chhar­chhuah ka inbeisei a ni," tiin hlawhtlin châka a la tuihal reng thu a sawi.

Asia rama tour neia zin­chhuak mek Liverpool hian an match hnuhnung berah Malaysia XI chu 1-1 in an in­hneh­tawk pui a, Malaysia XI tan Patrick Ronaldinho Wleh chuan goal hmahruai khungin Liverpool tan Jordan Ibe chuan an siphurh hi a sut a ni.

Tour-ah hian Liverpool player thar Christian Ben­teke leh Roberto Firmino bakah Mario Balotelli, Jose Enrique leh Fabio Borini te an zin ve lo.