Di Maria-a'n France lam a hawi
Manchester United manager Louis van Gaal chuan San Jose Earthquakes an hneh hnuah Angel di Maria chungchang sawiin, "Ka sawi fo tawh angin Di Maria chungchang hi chu buaipui mek a ni a, a chian hunah chuan kan ṭawngchhuak mai ang. Tuna thuchiang awm chu July 25 hian min rawn zawm ang," tiin a sawi.
Dutch manager-in thuchiang a tih hi a takin a thleng lo, Angel Di Maria hi Inrinni zana Manchester United leh Barcelona inkhelh ṭuma tel turin US a la thleng lo hrim hrim. Argentine winger hi French chanchinbu L'Equipe chuan pound maktaduai 46.5-in Paris St Germain a zawm dawn tihin a tarlang.
Van Gaal chuan, "Thlawhtheihnaah khan an chuang lo a ni. Marcos Rojo tel loh chhan chu passport fel loh vang a ni a, Angel Di Maria tel loh chhan erawh engmah ka hriat loh avangin sawi theih ka nei lo," tiin Copa America vanga chawlh hmang rei Argentina player chungchang a sawi.
Report ṭhenkhatah erawh Di Maria hian US lam a pan dawn tho nia sawi a ni a, a kalna tur erawh PSG inngahna hmun New Jersey a ni a, he hmunah hian Ligue 1 club tan hian medical test a nei dawn niin an tarlang.
Ningani zing dar 6:20-ah United leh PSG te hi an inkhel dawn a, hemi zawh hian Di Maria chungchang hi an club pahnih hian chingfel tura ngaih a ni. Argentine winger thlak tur hian United-in Barcelona winger Pedro chu pound maktaduai 22-in leichhuah an tum niin sawi a awm bawk.
Van Gaal thukhawchang
Di Maria tel loin United-in Barcelona an hneh a, manager Van Gaal chuan, "Barca-in goal khung tur kha De Gea khan a dang nghal a, chhuah ta se chuan result a dang daih theih. Inkhel result thlak danglam theitu a nih avangin De Gea hi kan bulah awm zel se ka duh," tiin Real Madrid nena sawi zawm David de Gea chungchang a sawi.
Dutch manager hian United rawlthar, a bik takin Jesse Lingard (kum 22) leh Adnan Januzaj (kum 20) te chu a fak a, Wayne Rooney leh pound maktaduai 31 man Memphis Depay te inkawp chuan Barcelona tlar hnung an chhaih buai avanga a lawmthu a sawi bawk.