CONCACAF Gold Cup US hnehtu Panama pathumna

Inrinni zan khan CON­CACAF Gold Cup 2015 pa­thumna zawnna inkhelah Panama chuan champion lai United States chu penalty shootout-ah 3-2 in an hneh.

Pennsylvania hmuna inkhel­ah hian Panama tan first-choice goalkeeper Jaime Peneda leh top-scorer Luis Tejada te chu hrem vangin khel thei lo mah se goalkeeper Luis Mejia a che ṭha hle a, penalty vawi thum a dang.

Manager Hernan Dario Gomez a enkawl Panama tan Roberto Nurse chuan second half minute 55-ah goal khat a khung a, he goal hi US tan captain Clint Dempsey chuan minute 70-ah a sut ve leh. Dempsey hian tun tournament-ah hian goal sarih khungin top scorer a ni mek.

Semifinal-ah Panama hi Mexico lakah 2-1 in an tlawm, inkhel enkawl tu American referee Mark Geiger chuan Panama player pakhat a hnawhchhuah bakah Mexico hi penalty vawi hnih a pe bawk. Quarterfinal-ah Mexico hian Costa Rica chu penalty sawi hlawh tak hmangin an lo hneh tawh bawk.

Heng thil thleng hian sawizui a hlawh em avangin CONCACAF chuan thamna a awm em tih chu an chhuichian tur thu an sawi.

CONCACAF president lailawk Alfredo Hawit chuan, "Referee Depart­ment leh referee Mark Geiger pawh kan be tawh a, a thutlukna kha a tihsual a nih thu a sawi tawh. Ani hi kan ram bialah chuan kan refree ṭha berte zing ami a ni a, mahse mihring a nih ve tho avangin tihsual chu a nei thei," tiin a sawi.

Nizan khan Mexico leh Jamai­ca te chuan Philadelphi-ah final an khel a, result kan hre hman lo.