Atletico de Kolkata-in Drogba an duh
Tun hnaia Major League Soccer club Chicago Fire leh Montreal Impact nena sawi zawm hlawh mek Didier Drogba chu Indian Super League champion Atletico de Kolkata-in lakluh tumin an be mek nia sawi a ni.
Kum 37-a upa striker hi Kolkata club hian thla thum chhung atan dollar maktaduai 1 hlawh turin an sawm a, hei bakah hian a contract neih chhunga a khawsakna man leh senso zawng zawng tumsak vek an inhuam bawk.
Uk lama football agent Baljit Rihal chuan Atletico de Kolkata hian Drogba an dawr ngei thu a tichiang tawh a, mahse Ivorian striker hian MLS lam a hawi zawk niin a sawi.
Drogba duhtu langsar MLS club Chicago Fire chuan kum khata dollar maktaduai 3 hlawh turin Chelsea striker hlui hi an sawm mek a, MLS club rau rauah Drogba hian French ṭawng hmanna khawpui club Montreal Impact lam a hawi zawk nia sawi a ni.
Indian Super League club te hian July 31 thleng marquee player tur an la lut thei dawn a, Drogba hian ISL club hi zawm a duh a nih chuan thutlukna a siam vat a ngai dawn a ni.