Tualchhung Table Tennis Mizoram Hexa League club lilamna an zo
Zirtawpni zan khan MTT Hall, Mission Vengah Mizoram Hexa League club lilamna chu felfai taka zawhfel a ni.
MHL club lilamnaah hian MHL Organizing Board-in dan a siam paltlang club pariat an kal a; Ramhlun Sporting Club, Mission Vengthlang TT Club, Bungkawn Sporting Club, Tuikhuahtlang TT Club, the Smashers (Vaivakawn) leh Mission Veng La Paloma ten MHL club an chang.
MHL hi September 1 aṭanga ṭan tur a ni a, October 27 thleng khelh tur a ni. Auction neih zawhah MHL team leitu Club-te leh MTTA chuan agreement ziak nghalin player-te leh an club hruaituten agreement an ziak nghal bawk a ni.
Auction chu
Lilamna neih hma hian MHL Organising Board-in team paruk tur hi an siam sa thlap a, team tinah hian Youth Boys, Men's Singles leh Men's Above 35 Singles aṭanga top ranked player-te chu dahkhawm an ni a, anni bakah hian team tina hmunruak pakhat ṭheuh hnawhkhah nan wild card system-in qualifying khelh a ni.
Player-te hi MHL atan bika lakkhawm a ni a, inelna zawh hian club pangngaiah an let leh ang.
MHL Team 1 : Changtu - Ramhlun Sporting Club
Auction hi Mizoram Men’s Singles leh Men’s Above 35 Singles a Top Rank No 1 awm dunna Team 1 aṭangin ṭan a ni a, Ramhlun Sporting Club-in Rs 5000 a an chhanna chu club dangin lehthal tawh loin an chang nghal.
MHL Team 2 : Mission Vengthlang TT Club
Team 2 Auction ṭan ve leh nghal a ni a; Mission Vengthlang, Tuithiang leh Bungkawn ten Mens Singles defending champion Lalmalsawma awmna hi an inchuh a, Mission VT-in an chang.
Mission VT aiawh Zorema Pachuau chuan Rs 40,000 thleng thehchhuah an inhuam laia man tlawm zawka an chang thei chu lawmawm a tih thu a sawi.
MHL Team 3 : Bungkawn Sporting Club
Bungkawn Sporting Club chuan an vengchhung TT player pahnih awmna Team 3 hi chan ngei tumin cheng 3500-in an rawn chhang ṭan. Tuikhuahtlang, Vaivakawn leh Tuithiang ten chuhpui ve mah se a tlawm zawkah ṭang duh loin a tawpah Rs 6000-in Team 3 chu Bungkawn Sporting Club tan an lei ta a ni.
MHL Team 4 :
Tuikhuahtlang TT Club
Mizoram no 1 lo ni tawh pahnih awmna Team 4 chu Auction leh a ni a, Tuikhuahtlang, Zote leh Tuithiang te chuan inchuhin a tawpah Tuikhuahtlang chuan Rs 8000-in team 4 hi an chang.
MHL Team 5 : The Smashers, Vaivakawn
Team 5 hi The Smashers, Vaivakawn chuan cheng 7500-in an chang. Smashers hian Tuithiang leh Zote Sporting Club te aiin an ngam sang zawk.
MHL Team 6 : Mission Veng La Paloma
Team 6 lilam hun a thlen hian Mission Veng La Paloma, Tuithiang leh Zote SC ten chiahin club an la nei lo.
Mission Veng La Paloma-in Team 6 hi Rs 11,000 in an chhang a, MHL team zinga man to ber an ni.