Bolt a lo kir leh ta

Jamaican sprinter ropui Usain Bolt chuan inhliam vanga kar ruk chhung a chawlh hnuah Zirtawpni khan London-a neih mek Anniversary Games 100m intlansiakah hnehna a chang.

Olympic Stadium-a intlansiakah hian Bolt hian second 9.87 chhungin 100m a tlan thleng. A hnung chiahah hian American sprinter Michael Rodgers thlengin second 0.03-in an inthlau. Pathumnaah chuan Kemar Bailey-Cole thlengin ani hian second 9.92 a hmang thung.

Kum 2009 August thla khan German khawpui Berlin-ah Bolt hian second 9.58 chhungin 100m a lo tlan thleng tawh a, tun thlengin he world record khum thei hi an la awm lo.

Tun season-ah Ame­rican sprinter Justin Gatlin a che ṭha hle mai a, kuminah bik chuan mipa tlan chak ber ni mekin May thla khan second 9.74 chhung lekin 100m a lo tlan thleng tawh.

August thla khian China khawpui Beijing-ah World Athetics Cham­pionships a awm dawn a, he hunah hian sprinter pahnih Bolt leh Gatlin te hi mipui ngaihven leh inel ber tura ngaih an ni. Bolt hi 100m leh 200m champion lai ni mah se kumina che ṭha tak Gatlin hian chhuhsak ngei a tum ruh hle ang.

Kum 28-a upa Bolt chuan, "Tun aia tlan chak hi ka la duh, hun harsa ka tawh laiin keimah in dem mai loin hmalam ka thlir tlat ṭhin a, tunah chuan a rah ka hmu leh ta," tiin a sawi.

Thla thara World Cham­pionships tur thir lawkin Bolt chuan, "Vawi lehkhatah a ṭhat thut theih loh, mahse tunkar­ah ka chet ṭhat avangin Beijing-ah pawh hnehna chan ngei ka in beisei. A ṭha ber nih reng ka duh a, ka chawlh hma chu a ṭha ber nih zel ka tum bawk ang," a ti.

Olympic gold medal paruk ngawt dawng tawhtu Bolt hian World Championship-ah gold pariat ngawt a la tawh.