Falcao a inlan, Chelsea an chak

Premier League champion Chelsea-in an match hmasa bera MLS club New York City Red Bulls an hnehloh hnuah French champion Paris St Germain chu penalty-ah 6-5 in an hneh.

Pathianni zing khan Charlotte, North Carolina-ah Chelsea leh PSG an inhma­chhawn a, inkhel nung tak lantir lo mah se substitute Radamel Falcao chuan season liamta khan Manchester United tan match 29-ah goal li chauh khung mah se field chhungah a rintlak tih a phochhuak.

PSG striker Zlatan Ibrahi­mo­vic-a'n a teammate Jean-Kevin Augustin goal ban pet per let chu minute 24-na lekah goal-ah a chantir a, Chelsea-in Victor Moses hmangin minute 65-naah an sut.

New York an hmachhawn ṭumin Chelsea keeper an che ṭha lo a, PSG nen erawh an langsar. Keeper thar Asmir Begovic-a'n PSG tana Lucas Moura goal khung tur chu vawi hnih a dan sak. Hun pangngaiah 1-1 a nih avangin penalty an pet a, Falcao-a'n Chelsea goal hmasa ber a khung a, Colombia player tho Juan Cuadrado-a'n a khung ve lo. Second half-a lut Thibaut Courtois-a'n vawi hnih a save hnuah penalty vawi sarihna petin chakna goal a khung.

Chelsea hian July 29 khian Barcelona an hmachhawn ang a, August 2-ah Arsenal nen Wembley Stadium-ah Community Shield an khel ang. Community Shield zawh hian Stamford Bridge-ah Fiorentina an mikhual leh ang.