Aizawl FC hmaah Real Kashmir

Aizawl FC-in March 9, Pathianni tlai dar 2:00 hian Real Kashmir an hmachhawn dawn a, Aizawl FC player hlui Lalramsanga telna Snow Leopards hian champion beiseina an la neih avangin Mizo club tan a harsa dawn. Victor Lalbiakmawia hote tana harsatna belhchhah turin inkhelhna hmun tur hi TRC Polo Synthetic Turf Ground, Srinagar a ni a, Ishfaq Ahmed hote hi mahni mual hmang thiam an ni.

Real Kashmir leh Aizawl FC hi RG Stadium-ah an inkhel tawh a, Mizo club-in Lalrinzuala hmangin goal an khung hmasa a, Snow Leopards hian minute 90-naah Shahid Wani hmangin an sut. Tuna an inkhelh leh meuh chuan Ishfaq Ahmed hoten champion an la beisei a, Mizo club erawh tla thei dinhmunah an ding. Aizawl FC hian Srinagar an tlawh hnuhnun ber ṭumin point khat an hlawh chhuak a, tun ṭumah pawh hian point hlawhchhuah hrim hrim a pawimawh ang.

Mizo club hian an elpui SC Bengaluru an hneh avangin an phur a, chutihrualin an khingpui Real Kashmir hian champion inbeisei Inter Kashi 3-1 in an hneh a, an boruak ṭhat lai ve tho a ni. Inter Kashi hi Real Kashmir laka an tlawm hnuah an insiam ṭha a, March 6, Ningani khan Namdhari 3-2 in an hneh a, chakna goal hi Mizo tlangval Edmund Lalrindika'n a khung.