Kan tan harhna tur a ni - Son

Tottenham Hotspur chu AZ Alkmaar lakah 1-0 in an chak lo. Europa League last 16 first leg-a an chak lohna chu an tan harh tura kohna niin Spurs captain Son Heung-min chuan a sawi.

Ningani zan inkhelah Tottenham midfielder Lucas Bergvall chuan anmahni lamah a ti lut a, Swedish rawlthar goal khung hi Dutch club AZ Alkmaar lamin chakna atan an lo hmang thung a ni.

Ange Postecoglou leh a naute hian goal khat chauh an chhuah hi an vannei - North London club goalkeeper Guglielmo Vicario chuan an lama lut tur vawi thum ngawt mai ṭha zet zetin a lo dansak.

Spurs captain Son-a chuan, "Tun ṭuma kan khelh ang kha chu Spurs nihna a ni lo, kawng tinrengin kan che fuh lo vek ni maiin ka hria. Tum dan chu nei ve ṭhin mah ila a takin kan ti thei lo zel.

"Kan chak lohna leh khelh ṭhat lohna hi kan tan harhna ni se la, ṭha leh zual zawka khel tura min cho chhuaktu a nih ngei ka duhin ka beisei bawk a ni," tiin a sawi.

Tottenham hian Pathianni zan dar 7:30 hian Premier League khel turin Bournemout an mikhual zui leh nghal dawn a, kar leh lama Europa League an khelh leh tur atan insiamṭhatna hun a ni thei ang.