Vini-a'n Saudi club inbiakpui

Real Madrid-a cham a duh thu sawi rengtu Vinicius Jr chuan Saudi Arabia lam a hnungchhawn tawp duh bik lo a, Saudi Pro League club-te hnenah an ramah a kal dawn a nih chuan contract rei lo zawk a duh thu a hrilh niin an sawi.

Vini hian kum 2027 thleng Real-ah contract a nei a, kum tir khan Real nen hian contract thar chungchangah an indawr ṭan tawh. A tir lama Real dawrna a hnar hnuah February thlatir khan a hlawh phut zat an zawt.

Brazil international hian Real-ah a cham dawn a nih chuan kum khatah euro maktaduai 20 hlawh a duh a, hei hi club player hlawh hnem ber Kylian Mbappe hlawh ang zat a ni - Vini hian kum khatah €15mtd a hlawh mek.

Real hian Vini phut ang zat hi pek an harsat nia sawi a ni a, kum 24 mi hi heti zat hlawh pea contract thar an ziahpui a nih chuan Jude Bellingham a nghawng ve nghal dawn a, Real-in sum insen belhna tur lam hi an ngaihtuah lo thei lo.

Hetihlai hian Saudi club-te chuan Vini hi €400mtd-a lei an inhuam a, kum nga chhunga €1tld hlawhtir an inhuam niin an sawi. Mahse, Vini hian Real nen an inrem thei ta lo a, Saudi a pan dawn a nih chuan kum tlem zawk atan contract ziah a, Europe-a kir leh theih a duh niin an sawi.

Vini hian Real-a a hlim thu a sawi fo a, "Ka rilruah chi aina a awm lo. Santiago Bernabeu-ah kum 2027 thleng khel turin contract ka nei a, he hmuna ka hlim em avangin contract thar pawh ka ziah thuai ka beisei," tiin a lo sawi tawh.

Mahse, Saudi club lam a inbiakpui tho avangin a rilru zawng zawng Real-ah a pe rih bik lo tih a chiang. Madrid khaw club hian Pathianni zan dar 8:45-ah Rayo Vallecano chu league match khel turin an mikhual dawn.

Real hian an league match hnuhnung berah Real Betis an ngam loh avangin table-ah pathumna an ni mek. Barcelona chuan table chung ber luahin, zanin dar 1:30 hian Osasuna an mikhual dawn a, Pathianni zan dar 6:30-ah Atletico Madrid chuan Getafe an lenchilh ang.

Spanish top flight league-a top three team hian karlehah Champions League last 16 second leg khelh tur an nei vek a, an player neih ṭhatte an hahdamtir a rinawm.

Barcelona hian March 11, Thawhlehni zanah first leg-a 1-0 a an hneh hnu Benfica an mikhual dawn a, March 12, Nilaini zanah Madrid derby khelh a ni ang a, Atletico-in first leg-a 2-1 a an ngam loh Real Madrid an mikhual ang.