Chelsea an chak

Europa Conference League last 16-ah Chelsea an chak a, first leg inkhelah F.C. Copenhagen chu 2-1 in an hneh - Blues hian first half chhungin target-ah shot an nei miah lo a, mahse, second half-ah goal hnih an khung.

Blues tan second half ṭan aṭanga minute khatna lekah captain Reece James chuan goal mawi bik a khung a, minute 65-naah substitute Enzo Fernandez chuan Chelsea tan a khung belh bawk.

London club hi nuamsain an chak tawh mai dawn niin a lang hman a, mahse, minute 79-naah Gabriel Pereira a inlar a, Marcos Lopez-a freekick aṭanga ball kal chu a tauh lut - goal dang erawh a lut tawh lo a, 2-1 in Chelsea an chak.

March 13, Ningani zanah second leg khelh a ni dawn a, Blues khelmualah Copenhagen an len dawn avangin Danish club tan 'comeback' a harsa dawn.

ECL last 16 khelh hmaa an match hnuhnung palia vawi khat chiah chak Chelsea hi Pathianni dar 7:30-ah league match khel turin an inlan zui dawn a, Leicester City an mikhual ang.

Foxes hi tlak hlau an ni a, Chelsea hi season thara Champions League khelh phak tum an ni thung. Blues hi table-ah pangana an ni mek a, palina Manchester City chu point khat chauhin an phak lo mek.

Chelsea boss Enzo Maresca chuan, "Kan goal chhuah dan a ho hret a, khatiang kha chu veng thei tur kan ni. Mahse, football a ni a, tihsual chang chu a awm ve tur a ni. Minute 90 a zo ta a, minute 90 kan la bak a ni," a ti a, chakah a la inpawm lo.

Italian coach chuan Pathianni zan inkhel tur thlir zuiin, "Kan rilru luahtu ber chu Pathianni zana kan inkhel tur hi a ni. Kan fan-te minute 100 chhung min ṭawiawm turin ka beisei a, theihtawpin min nawr rawh se.

"Leicester lakah kan chak a nih chuan, top five nge top four nih ngai la chiang lo mah se, Champions League khelh kan hnaih sawt dawn tihna a ni," a ti - tun season European football-a English club-te an chet ṭhat viau chuan season tharah Premier League top five chinin Champions League an khel thei dawn a ni.