PSG tan indah ṭhat hun

Paris Saint-Germain chuan zanin dar 9:30 hian Ligue 1 khel turin Rennes an lenchilh dawn - Luis Enrique leh a naute hi Champions League match hautak khelh hmabak an nih avangin an indahṭhat a rinawm.

PSG hian Liverpool lakah inkhel thunun hle mah se 1-0 in an chak lo a, kar leh hian Anfield-ah UCL last 16 second leg khel turin an lenglut leh dawn a, thapui thawh thei tur chuan kartawpah an hahdam a ngai.

Paris club hian league match 24 aṭanga point 62 hmuin hma an hruai mek a, anmahni hnaih bertu Marseille aiin point 12 ngawtin an sang fal tawh, thil mak a thleng a nih ngawt loh chuan Ligue 1 champion an ni leh ang.

Arab sum hmanga siam len an nih hnuah club thuneitute duh ber erawh Champions League title a ni. Lionel Messi, Neymar leh Kylian Mbappe te an kawl khawm lai pawhin an ti thei lo thung.

Spanish coach ṭha Enrique an neih chinah beisei an nei sang mek, an hna hmasa chu Reds paltlang a ni dawn - Premier League hmahruaitu an hneh theihna tur chuan Ligue 1 lamah an inthlahdul rih hret a ngai dawn a ni.