Juve chuan ngaihdan nghet kan nei - Motta

Juventus manager Thiago Motta chuan pawn lam aṭanga midang ngaihdan leh sawi danah an buai lo tih a sawi a, tun hnaiah kawng dik an zawh chho mek tih a sawi bawk.

Italian club hian season an hmang ṭha tawk lo a, inelna hrang hrang aṭangin an tla zel. Serie A lamah champion an beisei ngam tawh chiah si lo, a sang thei ang bera hun tawp khar ngei erawh an tum.

Old Lady manager Motta chuan, "Team ṭha leh nghet tak hi vawi leh khata din hluai theih a ni lo, zawimuangin kan din tur a ni zawk. Inter Milan hi tuna an team hi an dinna a rei tawh.

"Napoli pawh hi chhut ula, hmanni lawka Serie A champion ni thei kha an ni, chuvangin keini chuan an dinhmun ang thleng tur hian hun kan mamawh a, thil tum kan neihah chuan nghet takin kan ding zel ang.

"Atalanta nen kan inkhel leh dawn, mite chuan Champions League khelhna inchuh angin an sawi a ni mai thei, keini erawh chuan Serie A match pawimawh tak pakhat khelh turah kan ngai," tiin a sawi.

Turin club hian Pathianni zan dar 1:15 hian Atalanta an mikhual dawn, coach Motta leh a naute hian hnehna an chang a nih chuan pathumna ni lai Atalanta hi umphak theihna remchang an nei dawn a ni.