Kanan leh Saitual tan final?

MFA Cup 2025-ah vawiin hian MPL kai thar club pahnih Kanan FC (Aizawl) leh MLS FC (Lawngtlai) te vawiin chhun dar 12:00 hian Chhangphut Field-ah an inkhel dawn a, chawhnu dar 2:30-ah Saitual Venglai (Saitual leh Vengthar GSA (Khawzawl) te an inkhel zui ang.

Group khat aṭangin team pahnihin semifinal an lut dawn a, MLS-in match hniha hnehna an chang ve ve avangin semifinal lut turin an dinhmun a ṭha ta hle. Aizawl First Division champion Kanan hian MLS hi an hneh lo a nih chuan final kalkawng a harsa sawt dawn a, Chawngthansanga hote tan vawiin hi final-a ngaih theih a ni.

Saitual Venglaiin match hmasa berah player 10-a khel chungin Kanan lakah point hlawh chhuak mah se MLS an hneh loh zui avangin point thum an mamawhna a sang tawh hle. Khawzawl Vengtharin chakin bul an ṭan a, PC Lalchhanchhuaha (Lalnaua) hote hian hnehna an chang a nih chuan an elpui Saitual club beiseina an titawp thei ang.

March 8, Inrinni khan group A team-te an inlan a, Kolasib club Electric Veng table chung bera awm turin Thenzawl club Thangzuala Memorial FC chu 3-1 in an lehthal. Inelna thlengtu Champhai club Kanan SC pawhin Siaha United 3-1 in an hneh a, Kolasib club nen an point hmuh zat a inang chiah. Match hnih khelh tur a la awm avangin semifinal khel tur a la chiang lo a, chutihrualin Electric Veng leh Kanan SC te knockout stage lut turin dinhmun a ṭha.