Match hmasa berah Djokovic chak lo!

Novak Djokovic tan boruak a fuh thei rih lo - Serbian star hi vawi nga a champion tawhna Indian Wells-ah a inlan a, hneh nei loin a match hmasa berah a chak lo nghal a ni.

Grand Slam vawi 24 champion tawh Djokovic hian nimin khan Botic van de Zandschulp a hmachhawn a, chak zawk tura rinkai ni mah se world number 85 lakah hian 6-2, 3-6, 6-1 in a chak lo.

Dutch tlangval Van de Zandschulp hi player langsar tak ni lo mah se, player langsar a henh leh nulh ṭhin. Season hmasa US Open-ah khan Carlos Alcaraz a hneh a, ram leh ram inelna Davis Cup an khelh ṭumin Rafael Nadal a lo hneh tawh bawk.

Kum 37 mi Djokovic hi Australian Open an khelh ṭum khan a inhliam a, a hnuah tun ṭum hi a inlan lehna hmasa a ni. Court 1-a inkhelah a tihsual vangin vawi 37 ngawt mai a khingpui in point a hmuh phah, tihsual a ngah lutuk chu a tuar.

Djokovic chuan, "Ka khelh chhiat chhanah khan chhuanlam siam tur engmah ka nei lo. Office hnathawk nen ni ṭha lo tak an tawng fuh ang mai hi ka ni a, ka tan chuan tih theih dang a awm rih lo.

"Tunlaia ka tennis khelh dan hi chu a ṭha tawk lo," a ti. Coach Andy Murray nen an zin dun a, player a nih laia world number 1 ni phak nen hian an thawhdun hnuah result chhuan tur tak an la nei lo, insiamṭhat erawh an tum ang.

Kumin Indian Wells khelhna hi an ti danglam a, inelna dang Miami Masters leh US Open khelhna te nena angkhat thei deuh turin hard court chu chei danglam a ni a, player ṭhenkhat chuan an tuar a ni.

Djokovic chuan, "A bik takin Centre Court-ah ball a sawt sang hle, a nihna takah chuan clay court ṭhenkhat aiin ball a sawt sang emaw tih mai tur a ni," a ti. Tunah chuan Miami Masters atan rilru a seng chhunzawm ang.

Indian Wells khelh laiah hian, seeded pakhatna Alexander Zverev chu hneh nei loin a tla nghal ve bawk. German tlangval hi a khingpui Tallon Griekspoor lakah 4-6, 7-6(5), 7-6(4) a chak loin a zinkawng a tawp nghal.

Griekspoor hian world number 5 chin hi vawi 19 a hmachhawn tawh a, tun ṭum hi hnehna a chan vawi khatna a ni hial. Seeded palina Casper Ruud pawh Marcos Giron lakah 7-6(4), 3-6, 6-2 in a chak lo ve bawk.