Chanmari FC elpuiten point an hloh

I League 2-ah Chanmari FC elpui SAT Tirur leh Sporting Clube de Goa ten point an hloh ve ve. Inrinni khan inelna chanve khelh zawh a ni a, Diamond Harbour-in point 20 hmua hmahruaitu niin Chanmari FC-in point 19 hmuin pahnihnaah an awm. Mizo club-in Kolkata club hneh lo mah se an elpuiten point an hloh zarah an hnuai chiaha awm Sporting Clube de Goa nen an inthlauhna chu point sarih a ni.

Inrinni khan Goan club hian FC Bengaluru United an mikhual a, goal awm loin an inhnehtawk. SAT Tirur-in Imphal-ah Trau an tlawh a, 2-1 in an chak lo. Manipur club pathum Klasa, Trau leh Neroca ten season bul ṭan ṭha lo mah se AIFF-in an muala inkhelh an phalsak a, season chawhnu lamah mahni muala khelh tur an ngah avangin danglamna thlen theitu an ni dawn.

Season liam taa I League-a khel Neroca phei chuan point 11 hmuin panganaah an invawrh chho leh tawh a, Mizo club tibuai theitu zinga mi an ni dawn. Chutihrualin Chanmari FC erawhin Trau hmachhawn tura Imphal an pan hmain March 12, Nilaini hian Goa-ah Sporting Clube de Goa an hmachhawn phawt ang.