Inter leh Milan an chak

Inrinni zan Serie A inkhelah Inter Milan chuan an mikhual Monza 3-2 in an hneh a, league hmahruaitu an ni chhunzawm - inkhel dangah AC Milan pawhin 3-2 thoin Lecce an hneh ve thung.

San Siro-a inkhelah Inter hian hnehna chang turin vanneihna an mamawh tel, mikhual Monza lamin Samuele Birindelli leh Keita Balde Diao te hmangin goal hnih ngawt an nei hmasa zawk.

Chawlhlawk hma chiahin striker Marko Arnautovic chuan sut ṭhin, second half-ah midfielder Hakan Calhanoglu chuan a sut zo a, Monza wing-back Giorgos Kyriakopoulos chuan anmahni lamah ti lut palhin Inter an chak phah.

Inter Milan manager Simone Inzaghi chuan, "Monza khan Alessandro Nesta enkawl an ni a, chuvangin an danglam hle. Player kan nih laiin Lazio tan kan khel dun a, kan captain a ni ṭhin.

"Milan tan kan khel dun leh bawk a, ka teammate mai ni loin unaupa ang mai a ni bawk. Kan inhriatchian avangin ka naute khelh dan tur pawh a hrethiam sa hle, chuvangin an tlarhnung sut hawn kha a harsa hle a ni," tiin a sawi.

Italian champion lai Inter hian point 61 hmuin hma an hruai zel a, pahnihna Napoli chuan point 57 an hmu thung - Antonio Conte naute hian match khatin an khel tlem, an hmabakah an chak chuan an inkar a zim leh ang.

Inkhel dangah AC Milan chuan vawi hnih ngawt goal an phur hmasa. Leece forward Nikola Krstovic-a'n goal hnih a khung chu Antonini Gallo chuan anmahni lama a tih luh hmangin an sut ṭhen a, chumi hnuah Christian Pulisic chuan goal hnih a belhchhah.

Milan manager Sergio Conceicao chuan, "Tun ṭum chu kan match khelh tur atan inbuatsaihna hun kan nei tam hret a, kan khingpui Lecce ṭhatna leh an ṭhat tawk lohna lai kan hre thei a, inkhelh a ti nuam hle.

"Goal thum kan nei a, lawmna tur a ni. Chutihrualin goal hnih kan chhuah a nih chuan a hnung lam inenfiah a ngai, hnehna chang tur chuan hmun tinah inbuktawk taka kan awm tlan a ngai," tiin a sawi.