PSG tan nomawi a hnai ta

Paris Saint-Germain chuan Ligue 1 nomawi an hnaih ta hle! Inrinni zan Ligue 1 inkhelah PSG hian Rennes chu 4-1 in an sawp a, forward ṭha Ousmane Dembele chuan goal hnih a khung.

Liverpool laka goal an khung theih loh hnuah Luis Enrique leh a naute fiahin an awm. Roazhon Park-a inkhelah erawh goal an khung ta, minute 27-naah Bradley Barcola chaun a khung ṭan nghal.

Goal hmahruai khungtu Barcola bawk hian second half-ah Goncalo Ramos tan a siamsak a, mualneitu lamin Lilian Brassier hmangin khung ve mah se, hun tawp dawnah Dembele chuan goal hnih hmangin chak a nemnghet.

Paris Saint Germain hian Ligue 1 match 25 an khelh aṭanga point 65 hmuin table chung berah an awm a, anmahni hnaih bertu Marseille aiin point 16 tehmeuhin an sang fal tawh a, a zawna a vawi li nan league nomawi an chawi ngei dawn niin a lang.

PSG manager Luis Enrique chuan, "Champions League match hautak khelh hnua hnehna chan theih hi a pawimawh hle. Rennes khan an khel chhe lo a, ka naute zawng zawng khan theihtawp tak meuh an chhuah.

"Liverpool laka kan chak lohna kha inhliahkhuh leh nghal a ngai a, tunah chuan Reds nena kan inkhelh tur atan rilru kan pe leh nghal ang," tiin a sawi a, inelna lian Champions League a ngaipawimawh hle.

PSG hian inkhel thunun tak chungin Liverpool 1-0 in an hneh lo. Thawhlehni zan hian UCL last 16 second leg khel tuin Anfield an tlawh zui leh nghal dawn, match hautak a nih dawn avangin Rennes lakah player ṭha ṭhenkhat hahdamna hun an pe.