Bayern leh Leverkusen an chak lo

Kar laihawl Champions League-ah Bayern Munich leh Bayer Leverkusen te an inkhel a, kartawpah German club ṭha pahnih hi an chak lo ve ve. Vincent Kompany kaihhruai Bayern-in Allianz Arena-ah FC Bochum chu 3-2 in an inlehthlal tir a, Bayer Leverkusen pawh an mual Bay Arena-ah Werder Bremen lakah 2-0 in an chak lo.

Bayern Munich-in match 25-ah point 61 hmuin hmahruaitu an ni a, Leverkusen-in point 53 hmuin an elpui hi point riatin an pha lo. Bundesliga-ah match kua chiah khelh tur a awm tawh a, Kompany hote tan nomawi a hnai zel.

March 11, Thawhlehni zan hian Leverkusen-in Champions League last 16 second leg-ah Bayern an mikhual dawn a, Allianz Arena-ah Xabi Alonso hote 3-0 ngawta an tlawm avangin thawhchhuah har tawh khawp ang.

Chhuanlam siam lo

Bayern-in Raphael Guerreiro goal hmangin hma an hruai a, Bochum-in Jakov Mediv hmanga siphurh an sut hnuah Joao Palhinha hnawhhchhuah a ni. Player 10-a an khelh hnuah Bayern-in goal hnih an chhuah belh a, Bochum tan Ibrahima Sissoko leh Matus Bero ten an khung.

Inkhelh banah Vincent Kompany chuan, "Palhinha red card vangin player 10-in kan khel a, chhuanlam tur erawh a ni lo. 2-1 a hma kan hruai tawh avangin chak thei tur kan ni," tiin chhuanlam a siam lo a, Leverkusen chak loh chungchang a ngaih pawimawh loh thu a sawi bawk.

Leverkusen an chak lo

Bayer Leverkusen-in Bayern hnaih theihna hun ṭha an bawhpelh a, Werder Bremen 2-0 in an hneh lo. Xabi Alonso tan chanchin duhawm loh a awm belh a, Florian Wirtz chu hliam vangin thlak a ṭul.

Wirtz hian Bayern Munich a hmachhawn theih a rinawm lo a, Leverkusen tan thawhchhuah a harsa sawt ang. Inkhel dangah Borussia Dortmund an tlawm bawk a, Bundesliga-ah 2006-07 season hnua Bayern Munich, Borussia Dortmund leh Bayer Leverkusen te kartawpa an chak loh rual lehna chiah a ni.