Gauff chak ve leh ta

Australian Open an khelh zawh hnuah Coco Gauff a che fuh hleithei lo a, tunah chuan chak ni hmel a hmu ve leh ta. American star hian Indian Wells a match hmasa berah Moyuka Uchijima a hneh.

Nimin zing khan Court 2-ah player pahnih te an intawng a, inkhel hmuhnawm takah seeded pathumna Gauff hi 6-4, 3-6, 7-6 (7/4) in a chak zawkah a ṭang, a match lehpekah chuan seeded 29-na Maria Kakkari a tum leh ang.

Hnehna chang mah se Gauff hian siamṭhat ngai a la ngah hle, ṭum 21 teh meuh double fault a nei, a service sual vanga a khingpuiin point a hmuh hi a tam tham a, round sangah chuan chak loh pui tham a tling.

World number 3 Gauff chuan, "Ka tan chuan hun harsa ve tak mai a ni a, tunah chuan ka ritphurh ṭhenkhat chu chhawk zangkai ang maiin ka awm, duhthusam vek la ni lo mah se hnehna ka chan leh tak avangin ka rilru pawh a hlim," tiin a sawi.

Inkhel dangah Maria Sakkari chuan Viktoriya Tomova chu 6-0, 6-3 in a lo hneh ve thung a, season hmasa khan Sakkari leh Gauff te hi Indian Wells semifinal-ah an lo intawng tawh bawk.

Seeded pakhatna Aryna Sabalenka, seeded 10-na Emma Navarro leh Diana Shnaider te chuan an khingpui ṭheuh an lo hneh tawh bawk a ni.