Liverpool an chak hram; Fabinho a inhliam!

Champions League group stage-a an match hnihnaah Liverpool-in an ṭhat dan bera khel lo chungin FC Midtjylland chu 2-0 in an hneh a, Diogo Jota leh Mohamed Salah-ten goal khat ve ve an khung. 

Anfield-a inkhelah Liverpool chak aia sawi zui hlawh erawh Fabinho inhliam chu a ni a, Virgil van Dijk inhliam vanga centre back-a khel midfielder hi minute 30-naah lakchhuah a ngai. 

He thu buatsaih thleng hian Fabinho chawlh chen tur a la chiang lo a, Liverpool boss Jurgen Klopp chuan, "Engmah a la chiang lo a, mahse lungawi taka thlir theih chi erawh a ni lo," tiin a player inhliam chungchang a sawi. 

Group D inkhel dangah Atalanta leh Ajax chu 2-2 in an inhnehtawk a, Ajax hian Dusan Tadic (penalty) leh Lassina Traoré hmangin vawi hnih ngawt hma hruai mah se Atalanta hian Duván Zapata hmangin an sut zo ve ve a ni. 

Tun hnaiah Liverpool boruak a ṭha lo a, Covid-19 leh player inhliamin squad-a tibuai - Thawhṭanni zan inkhelah pawh hliam vangin  Joel Matip leh  Thiago Alcantara te chu squad-ah an tel lo a, Naby Keita chu Covid-19 vangin a inlan thei lo bawk. 

Klopp-a'n Danish club a dah sang lo tih a player rem danah a tilang a, inhliam a ngah vangin a fimkhur tel tih a lang bawk. German coach hian tlarhmaa a player neih ṭhat Sadio Mane, Mohamed Salah leh Roberto Firmino chu bench lamah hun a hmantir. 

Player pathum aiah Jota, Divock Origi leh Takumi Minamino te chu bul ṭantir an ni a, bench lama a hun tam zawk hmangtu Xherdan Shaqiri chuan inkhel bul a ṭan bawk. 

Klopp-a player hman ten beisei angin Anfield-ah game an thlak danglam thei lo a, season hmasaa Liverpool team hmuhnawm tak kha tun season-ah hmuhtirin kan la awm meuh lo. 

Reds khelh dan enin goal an khung loh mai hlauhthawnna fans zingah a lian hman a, mahse Liverpool player-ten chawlhlawk laiin Jurgen Klopp hnen aṭangin thu ṭha an dawng niin a lang. 

Minute 55-naah fan-te beisei ang ngeiin goal an rawn khung a, Shaqiri-a ball siamsak ṭha zet chu Trent Alexander-Arnold chuan Jota tan a siamsak ve leh a, Portuguese forward tan goal-a chantir turin harsatna a awm lo - Reds goal 10,000-na a ni. 

Shaqiri hian ṭha taka goal a hlawhchhuah hnuah goal khungna remchang a nei a, Midtjylland defender Alexander Scholz mawi zeta a lam khum hnuah Danish club penalty box-ah ball a lalut a, mahse defender Paulinho chuan a lo dang hman. 

Midtjylland lamin chance an neih ve tho avangin Klopp-a'n an him lo tih hriain minute 60-naah Salah leh Mane a luhtir a, hun pek belhah Salah hian chak nemnghehna a khung - Paulinho chuan Egyptian forward hi a ti tlu a, Salah-a'n goal-a chantir turin harsatna a nei lo. 

Liverpool tan Jota-a'n goal a khung leh ta a, Reds-a pan hnuah match riat khelin goal thum a khung ta - goal a khung tih loh erawh Portuguese forward hi fakna tur a tam lo. 

Shaqiri a khel ṭha a, squad tihchhah nan chuan player ṭha tak a ni tih a lan nawn tir - Minamino hian theihna sang tak nei mah se Red Bull Salzburg    -a a theihna ang erawh kan la hmu lo a, Origi hi Salah, Mane leh Firmino-te thachhang dawltu meuh atan chuan beisei a bo deuh chu a ni. 

Liverpool-in inhliam an neih piahlama an squad chhah tawk lohna tilangtu chu Klopp-a'n mangan tawpah Salah, Mane leh Firmino a luhtir a ngai leh tho kha a ni a, Midtjylland vanneih ṭum ni se point hloh thei hial an niin a lang. 

Midtjylland hian inkhel ṭantir lamah Anders Dreyer hmangin hun ṭha an nei a, Alisson chuan ṭha zetin a dang - Dreyer hian chance ṭha dang a neih bakah bench aṭanga luhtir Evander chuan hun duhawm a nei bawk a, Klopp tan hmuh nuam a ni lo. 

Liverpool-in khel ṭha lo chungin point thum an hlawh chhuak a, mahse Klopp tan lawm theih a ni lo - a aia ṭha zawka an khelh dan tur ngaihtuah a ngai a, Fabinho a inhliam bawk. 

Klopp chuan, "Fab khan a malpuiah hliam a nei a, khel lui thei chu ni mah se tlan chak a harsat tur thu a sawi. A hliam endik a nih hunah kan hrechiang dawn a, tun dinhmunah chuan chanchin lawmawm a ni lo," a ti. 

Liverpool hian Premier League-ah Inrinni zan dar 11:00 khian West Ham an mikhual zui dawn a, Klopp-a'n Joel Matip dinhmun a la sawi chian theih bawk si loh avangin tlarhnung lama Liverpool dinhmun a ṭha lo takzet.

Second half-ah Jordan Henderson lakchhuah a nih avangin hlauhthawnna a awm a, mahse Klopp chuan, "Hendo-a inhliam lo a, a khelh chhunzawm theih thu a sawi. Mahse,  Georginio Wijnaldum nen 45 minute ve ve khelhtir turin thutlukna ka siam sa a, chutiang chuan ka kaltlang a ni," tiin a sawi. 

Liverpool-in match hnih an khelhah point ruk an neih avangin last 16 lut mai tura ngaih an ni a, hmun ruak dang pakhat hi Ajax leh Atalanta-ten an inchuh tura ngaih a ni - tunah chuan Atalanta dinhmun a ṭha zawk. 

Atalanta hian an match hmasa berah Midtjylland hi 4-0 in an sawp tawh a, Ajax erawh Reds lakah 1-0 in an tlawm thung - Thawhlehni zanah team pahnih an intawng a, 2-2 in an inhnehtawk. 

Serie A-a an match hnuhnung pahniha tlawm Atalanta-in goal an chhuah hmasa a, Dutch league-a an match hnuhnung bera 13-0 ngawta chak Ajax tan Tadic chuan minute 30-naah penalty aṭangin goal hmahruai a khung. 

Mahse, Atalanta tan Zapata chuan a sut a, Ajax league match hnuhnung bera goal nga khungtu Traore chuan hmahruai vawi hnih nan goal a rawn khung leh - mahse, Zapata bawk rawn inlarin si phurh a sut leh a, a tawpah 2-2 in an ṭin.