FIFA-in insawifiah turin Russian Football Union (RFU) a phut

Tun hnaia Arsenal mid­fielder hlui Emmanuel Frimpong chungchanga vun rawng inhmuhsitna thil thleng sawi awm chungchangah FIFA chuan insawifiah turin Russian Football Union (RFU) a hriattir.

Ghanaian footballer Frim­pong hian kar hmasa Zirtawpnia a club khelh mekna FC Ufa leh Spartak Moscow inkhelh ṭumin zawng hram anga hram khum a nih thu a sawi a, hetianga amah tih eltu Spartak fan-te hi a kutzunglai a hmuh khum avangin hnawhchhuah a ni nghe nghe.

RFU hian match hnih khel thei lo turin Frimpong hi an hrem chhunzawm a, an zirchian hnuah vun rawng vanga inhmuhsitna eng thil mah a thleng lo nia ngaiin Spartak Moscow hi hrem pawh an hrem lo.

Russian football hruaitute thutlukna mak tak hian sawi a hlawh hle a, FIFA chuan kum 2018 World Cup thleng tur ram hi July 28 thleng insawifiahna hun a pek phah.

Hetihlai hian Frimpong-a te ram Ghana Football Asso­ciation pawh an ram player chhanin an ṭawngchhuak a, an player laka thil thleng chu an dem takzet thu sawiin Russian Football Union, UEFA leh FIFA te chu thil tisualtu laka na taka hremna lekkawh turin an phut.

Russia World Cup engtin?

Russia ram hi tunhma aṭangin mihang footballer ten hmuhist leh auh el an tawh nasatna hmun a ni a, a thil chin ṭha lo tak avang hian mi hang player engemaw zat khelhna tur kum 2018 World Cup an thleng tur pawh hian sawisel a hlawh hle.

Frimpong chuan hrem a nih hnu lawk khan, "Ka vun rawng vanga hmuhsitna ka tawrh vangin hrem ka ni dawn a, he ram hi World Cup thlengtu tur ram chu kan ni si a.." tiin twitter lamah mi hang player tana Russia World Cup khelh a him loh theih dan a sawi.

Manchester City mid­fielder Yaya Toure chuan a club leh CSKA Moscow an inkhelh ṭumin Russian club fan-te aṭanga vun rawng vanga hmuhsitna a tawn avangin mi hang player zawng zawng chu 2018 Russia World Cup-a inlan lo turin a lo ngen tawh.

Heti chung hian CSKA hian Toure-a puhna hi an pha a, UEFA lamin Toure hian vun rawng vanga hmuhsitna a tuar ngei nia an hriat thung avangin CSKA hi an lo hrem tawh bawk.

Zenit St Petersburg Bra­zi­lian striker Hulk chuan Russia rama inkhelhna match tinah vun rawng vanga in auh elna a thlen reng thu a sawi a, Russia World Cup 2018-ah pawh a thlen mai a hlauhthawnawm thu a sawi a ni.

FIFA hmasawn dan tur leh hmalakna buaipuitu ber Federico Addiechi chuan tun hnaia Russia football hmingchhiatna chu thaibo turin RFU nen an thawhho tur thu a sawi.

Addiechi chuan, "He tour­nament huaihawttu kan nihna angin World Cup hi mitin tana kal tlakna tura kan buatsaih a ngai. Football player chauh ni lo mipuite pawhin kal an chakna tura kan buatsaih a ngai a, RFU hian kan ṭanpuina an mamawh a nih phawt chuan theihtawp kan chhuahpui dawn a ni," a ti.

United Nations chief of anti-discrimination Yuri Boychenko meuh pawh a ṭawng chhuak a, Boychenko chuan, "Russia hian vun rawng vanga inhmuhsitna an ramah hian a thleng nasa tih an hre ve ṭan chauh a, an hriat hmasak phawt hnuah hma an la thei dawn chauh a ni," tiin Russia chuan hmalakna tur an la ngah thu a sawi.

Russia sport minister leh Fifa executive committee member ni bawk Vitaly Mutko chuan theihtawp chhuaha hma an lak mek thu leh vun rawng inhmuhsitna kalpui ṭhintute chu a na thei ang bera hrem an nih ṭhin tur thu a sawi a ni.

Russia leh Racism

Delhi Dynamos manager thar Roberto Carlos pawh hi Anzhi Makhachkala tana a khelh lai 201-ah khan balhla a vawm a lo ni tawh.

Kum 2012 khan Russian Premier League club zinga mi hang (African mi hang bik ) player la lut ngai miah lo awmchhun Zenit St Petersburg fan ṭhenkhat chuan mi ngo hlang chauh an club-ah an khel tur a ni tiin 'Selection 12' tiin campaign an lo nei chiam tawh bawk.

Football huang chhunga vun rawng vang leh hnam leh hnam ang zawnga inhmuhsitna thleng ṭhin tihbo tuma hma latu pawl 'Fare' chuan Russia ramah hian kum hnih chhung lekin vun rawng vanga inhmuhsitna vawi 200 chuang a thleng hman niin an sawi.