Croatia an hrem

Europe-a football thuneitu sang UEFA chuan Euro 2016 qualifying Group H a Croatia leh Italy an inkhelh ṭumin mualneitu Croatia khelmualah 'swastika' (Nazi chhinchhiahna) a lo inziah avangin Croatian Football Federation (CFF) chu point khat paihsakin £70,000 chawi turin a ti a, match khelh tur an la neih pahnih chu entu awmloa khel turin a hrem bawk.

CFF hian Italy nen 1-1 a an inhnehtawk ṭuma thil thleng hi zahthlak an tih thu leh pawi an tih thu an lo sawi tawh a, an duh a nih chuan UEFA hremna hi ngaihtuah ṭhat turin an khinglet thei dawn a ni.

An point neihsa paihsak an nichungin Croatia hi Italy chung chiahah awmin Group H ah hma an la hruai tho a, point 13 hmuin Italy-in point 12 an hmu. Group tina a sang pahnih hi Euro 2016 France-ah khelh turah an tling nghal dawn a ni.