I League club ten AIFF hruaitute an hmu

Season thar atana I League khel tur club hruaitute chuan Ningani khan New Delhi-ah All India Football Federation (AIFF) hotute an hmu a, I League in hma a sawn zawk theih nan leh mipui ngaihven an hlawh theih dan tur an sawiho.

He hunah hian AIFF aṭangin president Praful Patel, general secretary Kushal Das leh I-League CEO Sunando Dhar ten I League club hruaitute hi an lo dawngsawng a ni.

Praful Patel chuan tun hnaiah ISL lo chhuak mahse I League chu an ngaihpawimawh ber a nih thu a sawi a, AIFF chuan I League chu a hmasa berah a dah zel tur thu a sawi.

AIFF hruaitute leh I League club hotute chuan Marketing and Technical Committee din an rawt a, he committee hian I League-in ngaihven a hlawh zual zel theih nan hma an la ang.

Mizoram aṭanga I League khel hmasa ber tur Aizawl FC president Robert Romawia pawh he hunah hian telin I League club te chu an match hmasa ber enpui turin a sawm a ni.