Formula 1 Bianchi tel loin Hungarian Grand Prix

Kar hmasa Inrinni khan Formula 1 chhung­kuain chhiat an tawk a; Marussia driver Jules Bianchi an chan. Pathianni a tlan tur Hungarian Grand Prix hian nikum aiin ngaihven a hlawh dawn, a chhan chu nikuma he hmuna intlansiak ve Bianchi-a tel ve tawh dawn loh vang a ni.

2014 October, Japanese Grand Prix-a chesual, thla kua zet nikhaw hre loa a awm hnua boral ta kum 25-a upa Bianchi hi Hungaroring tlankawngah hian nikum khan 15-na a lo ni tawh. Motosport thu nei tu FIA thuchhuak angin naktuk hian intlansiak ṭan hma minute 15 la awmin Bianchi sunna hun neih tur a ni dawn a, minute khat chhung ngawi rengin an ding ang.

Kum 1986 aṭanga neih ṭan Hungarian Grand Prix hi Hungaroring tlankawngah tlan ṭhin niin km 4.381 a sei a ni a, lap 70 an tlan ṭhin. He hmunah hian kum 29 chhung chu khaihlak awm loin an lo intlansiak tawh a ni.

A vawi nga nan Hamilton?

Tun season intlansiak vawi kua awm tawh aṭanga point 194 hmua hmahruai mek tu Lewis Hamilton hi tlan chak leh ber tura ngaih a ni. Ani hian helai hmunah hian vawi li hnehna chang tawhin Michael Schumacher nen an ni aia chak tam an awm lo. Kuminah hian Mercedes driver Hamilton hian hnehna a chang a nih chuan chak hnem ber record thar a siam ang.

British driver Hamilton chuan, "Ka hriat phak ve chinah driver thi pathum an awm ta, a hmasa ber chu kum 1994 a thi Ayrton Senna kha a ni. A hnuah Daniel Spence boral lehin tunah chuan Jules kan chan leh. Tunkar kan intlansiak turah hian Jules kha ka rilruah ala lian ber a, intlansiakna hmuna a chet ṭhin dan ang khan chak ngei tumin driver ten kan bei vek ang," tiin a sawi. Hamilton hian Formula 1 intlansiak vawi 157 hmachhawn tawhin vawi 38 hnehna a chang tawh.

Kan ngaihthah theih miah lo tur chu Mercedes driver Nico Rosberg a ni ang, ani hi Hamilton nen tem inang ni mah se inel an nih avangin an inum leh hle tura ngaih a ni. Tun hnai intlansiak hnuhnung vawi nga aṭanga vawi thum hnehna chang thei Rosberg hian dirver championship-ah point 177 hmu mekin hmaruaitu Hamilton chu point 14 in a pha lo mek.

Ferrari an vul thei ang em?

Formula 1 team hlun leh lian berte zinga mi Ferrari hian tun season-ah Mercedes an phak lo hle. Malaysian Grand Prix-ah Sebastian Vettel-a'n hnehna a chan bak kha chu Mercedes-in hnehna an la chang fai vek.

World champion vawi li ni tawh Vettel hi a ṭan fuh ni chuan umphak ngaihna awm lo hial a ni. A teammate Kimi Raikkonen pawh hi Mercedes car umpha thei turin a ṭha tawk. Hungary-a thil thleng ṭhin mak tak mai chu Hamiltomn-a'n vawi li hnehna a chan ṭum hian Raikkonen hi pahnihna ala ni vek.

Kum 28-a upa German driver Vettel chuan, "Kuminah Mercedes hi dan an harsa hle, mahse March thla khan Malaysia-ah khan kan hneh thei a ni tih kan lantir tawh. Ferrari hi team hlun leh beidawng ve ngai lo kan nih avangin tunkar chu hnehna chan tawh ngei kan in beisei," tiin Mercedes hmaa tlan a tum hle.