Wenger-a'n player lei nan sum a nei

Arsenal director Lord Harris chuan an manager Arsene Wenger chuan a duh a nih phawt chuan a duh zawng player lei nan pound maktaduai 200 vel a neih thu a sawi.

North London club hian stadium thar Emirates Stadium an sak avangin hun rei tak chhung chu player lei nan sum an thehchhuak tam ngai lo. Mahse tunah chuan an duhzawng player lei turin sum an ngah tawk leh ta.

Player thar an lakluh tam loh bakah an player ṭha ten an chhuahsan ṭhin avangin Gunners hi kum kaw chhung zet chu eng inelnaah mah an champion lo. Mahse kum 2013 khan Real Madrid aṭangin club record fee-in Mesut Ozil chu pound maktaduai 42.4-in an la lut a, a kum lehah FA Cup-ah an champion zui.

Season hmasa ṭan dawn khan Barcelona aṭangin pound maktaduai 35-in forward Alexis Sanchez an la lut leh a, a vawi ruk nan FA Cup an chawi zui leh. Tun nipui transfer chhungin pound maktaduai 10 bawr velin Chelsea aṭangin Patr Cech an la lut leh bawk. Tunah hian Real Madrid forward Karim Benzema lak tumin an hel mek bawk a ni.

Gunners director Harris chuan, "Stadium kan sak avang khan player lei nan sum kan hmang tam thei lo ṭhin. Mahse tunah chuan khang hun kha a liam tawh a, kan manager hian a duh anih phawt chuan a duh zawng player lei nan sum hman tur a nei. Kan boss in tuna a lak a duh ber chu centre-forward a ni a, mahse tunge anih tih chu ka sawi thei rih lo" tiin a sawi.

Kum 72-a upa sumdawng hausa chuan Sawi chhunzawmin, "Lionel Messi leh Cristiano Ronaldo te an ni anih ngawt loh chuan kan duh zawng lei nan sum kan nei. Tun hmaa kan player lakluh tawh zawng zawng aia to pawh hi kan duh chuan kan lei thei ang. Mahse kan manager hi pa fing a nih avangin club ṭhenkhat angin ṭul loah pawisa a hmang mai mai lo ang. Kan hlawhtlin theihna tur tawk chu hman a hreh lo thung ang," tiin a ṭawng pawr hle.