Jose Mourinho-a'n De Bruyne a sawisel

Chelsea boss Jose Mourinho chuan Manchester City nena sawizawm hlawh mek Kevin De Bruyne chu player thawkrim tawk lo a nih thu a sawi.

Kum 24-a upa Bruyne hian season hmasa kha Wolfsburg tan a khel ṭha hle a, City hian pound maktaduai 60 velin an lei ngam ni a sawi a ni.

Mahse, kum 2014 January-a pound maktaduai 18 leka De Bruyne hralhtu Mourinho a in­chhir lo. Mourinho-an a enkawl ṭhat tawk loh vanga Chelsea chhuah­san anga insawitu De Bruyne chu sawiselin Portugu­ese manager chuan, "De Bruyne thusawi hi a dik tawk lo. Amah ngeiin hmun chang tura theihtawp chhuah a duh loh thu min hrilh a, engtiang pawhin awm se a khelh ngei ngeina tur club-a awm a duh ber thu min hrilh a ni," tiin De Bruyne-a thusawi chu a dik tawk loh thu a sawi.

Mourinho chuan sawi chhun­zawmin, "Kar tin inkhelh a duh thu min hrilh a, mahse kei chuan chu chu ka tiam thei lo. Kum naupang tak ila ni a, i khelhna anga khel thei Eden Hazard, Juan Mata, Willian leh Andre Schurrle te an awm avangin khel phak tur chuan theihtawp i chhuah a ngai a ni tiin ka hrilh a, chu chu a peih lo a ni," a ti.

'The Special One' chuan De Bruyne an hralh chu inchhirna a neih loh thu sawiin Chelsea leh ama tan pawh a ṭhat zawk thu a sawi.