Dzeko-a'n City a chhuahsan hnai
Manchester City manager Manuel Pellegrini chuan an striker Edin Dzeko chuan Etihad stadium a chhuahsan mai theih thu a sawi.
Kum 29-a upa striker hi City-in Australia-a pre season tour an neihnaah a kal ve a, Thawhlehnia City leh Roma an inkhelh ṭumah erawh a inlan ve lo. Bosnian striker inlan loh chhan hi Serie A club Roma zawm a tum vang nia sawi a ni.
Pellegrini chuan, "Edin-a'n kan match hnuhnung ber a khelh loh chhan chu kan hnena a cham chhunzawm zel dawn leh dawn loh chungchangah thuchiang a la awm loh vang a ni a, player dang ang thoin training erawh kan zingah a la nei ve reng a ni," a ti.
Bosnia-Hercegovina international Dzeko hian January 2011 khan pound maktaduai 27-in Wolfsburg aṭangin City hi a zawm a, nikum nipui lai khan kum li dang cham chhunzawm turin contract thar a ziak. Mahse, tlarhma neiṭha City-ah hmun a chang tam tawk lo a, season hmasa khan league match vawi 22 a inlanah goal li chiah a khung a ni.
Tun nipui transfer-ah City-in player pahnih an la lut tawh a, Liverpool aṭanga pound maktaduai 49 man Raheem Sterling an lei hnuin Aston Villa captain Fabian Delph chu pound maktaduai 8-in an la lut bawk.