Barca president Bartomeu a bang

Barcelona fan-ten an thu hriat chak an hre ta - president Josep Maria Bartomeu chuan banna a thehlut a, kum 57 mi Bartomeu rual hian board of directors ho chu an vaiin an bang ve bawk. 

Season hmasaa nomawi an chawi loh avangin Barca thuneitute demna hi fans zingah a ri ring tawh hle a, a bik takin Lionel Messi-a'n nipui transfer-a a chhuah duh thu a sawi phei kha chuan fan-ten club thuneitute an dem nasa hle. 

Spanish company ADELTE leh EFS-a share nei, sumdawng hausa Bartomeu hian January 2014 khan Barcelona President hna hi a chelh ṭan a, tun hi term hnih a chelhna a ni. 

Barca President hna hi term hnih aia rei chelh theih a nih loh avangin Bartomeu hi March-ah chuan chawl tawh tur chiang a ni a, mahse fans zingah amah duh lohna a rik rin tak em avangin banna a thehlut ta a ni. 

Barcelona hi European club lian dang ang lo takin fans thuneihna hnuaia awm a ni a, fans 'ta' a ni. September thla khan Bartomeu paih thlak nan fan-ten nasa taka ṭan lain 'vote of no confidence' hmachhawn thei dinhmunah a ding a, club member 20,000 chuangin an hming an ziah hnan hman.

Bartomeu hian Barca President awm tawh zinga  'vote of no confidence' hmanga paih thlak hmasak ber nih a duh loh avangin banna hi a thehlut niin a lang a, Bartomeu paih thla tur hian campaigner-ten vote an mamawh zat chu 60% a nih laiin 80% hmu turah an inngai a ni.   

Messi chuan, "Hun rei tak chhung tum mumal nei loin kan lokal tawh a ni," tiin Bartomeu hnuaia Barcelona kal dan chu a lo sawisel tawh a, hei hian fans zingah thu a sawi ring hle. 

Fan-ten Bartomeu an duh loh chhan ber hi sum laka an tlakchhiat vang te, khelmuala an beisei ang result an neih loh vang te leh an ngaihsan rawn Messi-a'n club thuneitute chunga rinna nghat loa chhuah a tum vangte a ni ber.

Bartomeu-a'n ngawi rengin Barcelona a chhuahsan lo a, Catalan club a chhuahsan thu a sawi rual hian European Premier League zawm tura an club sawmna chu a lo pawm tawh thu a sawi tel!

European Premier League-ah hian team 18 tel tura ruahmanna siam a ni a, pound tluklehdingawn 4.6 hu pawisa awm tawhna inelna turah hian English club lian Liverpool leh Manchester United pawh an tel dawn nia sawi a ni a, he league kalpui tak tak tur erawh chuan hun a la duh ang. 

Bartomeu-a'n Barca chhuahsan pahin UEFA pawhin a thlawp loh European Premier League-a sawi ri zauh a, La Liga president Javier Tebas-a lawm lo hle. 

Tebas chuan, "Hei hian Bartomeu-a'n football a ngaih pawimawh lohzia a tilang a ni," a ti a, European Premier League chu suangtuahna thil satliah, club ho tana chhiatna thlen thei thil a nih thu a sawi.

Bartomeu chuan European Premier League an khelh chuan sum harsatna an tawh mek lak aṭanga talchhuah theihna remchang a nih tur thu a sawi a, mahse Bartomeu-a'n a pawm avang ringawtin Barca hi EPL-ah hian an tel dawn tihna a ni chuang lo. 

European Premier League an zawm theihna tur chuan Barca hi fans ta a nih angin season ticket neituten vote hmanga an remtih a ngai dawn a ni.