Europa League Penalty-a chak West Ham an tlang

Manager Slaven Bilic-a'n a vawi li nan West Ham a kaihruai a; Birkirkara hnehin UEFA Europa League second qualifying round an paltlang.

An khelmual Upton Park-a 1-0 a n lo hneh tawh Malta club Birkirkara khel turin Ningani zan khan Premier League club West Ham an zin chhuak a, Juventus striker hlui Fabrizio Miccoli goal khat khung hmangin chak lo mah se inkhel hmasa nen belhkhawmin 1-1 a ni. Penalty shootout hmanga chak zawk zawn niin Hammers hi 5-3 in an chak. Substitute Diego Poyet chuan chakna goal a khung a ni.

Ta' Qali National Stadium-a inkhel hi a boruak a sang hle; West Ham player James Tomkins chu ṭul lo taka Nikola Vukanac a nam avangin hnawhchhuah a ni a, Birkirkara defender Mauricio Mazzetti chu hun tawp hma minte 12 ala awmin hnawhchhuah ni ve bawkin team pahnihin player 10-in an khel tluan.

West Ham hian third qualifying-ah Romanian club FC Astra an hmachhawn leh anga, an chak leh a nih chuan playoff an khel thei ang. Ployoff a chakte chuan Europa League group stage an khel thei dawn a ni.

Game borauak sang khel ṭhang lo London club hi inkhelh laiin talbuai deuh mah se penalty shootout-ah erawh an buai chhunzawm lo. West Ham tana penalty pet tu panga ten pet goal vekin Birkirkara goalkeeper Justin Habe an ti hrilhhai hle.

Season thar atan West Ham hian tun nipui transfer chhungin player pasarih ngawt la lut tawh mah se an player tharte an la chhawr mial lo a, an player pawimawh Enner Valencia leh Winston Reid an chhawr thei lo bawk.

Sam Allardyce thlaktu West Ham manager Bilic chuan, "Europe-ah tawnhriat kan la nei tam lo tih chu phat rual a ni lo. Mahse minute 120 chhung ṭha takin kan khel thei a ni. Game boruak dang daih tawn hian thil a harsa ṭhina mah se a tawpah chuan kan tlawm duh lohna rah sengin hnehna kan chang a ni," tiin a sawi.

Season hmasa khan Hammers hi Premier League-ah point 47 hmuin table-ah 12-na daih ni mah se 'fairpaly team' an nih avangin Europa qualifying hi an khel. Table-a pasarihna Southampton paw'n third qualifying aṭangin an khel dawn a ni.

Inkhel dang results

Newtown AFC 1 - 3 FC Copenhgn (agg 1 - 5)

Astra Giurgiu 0 - 0 Inverness CT (agg 1 - 0)

Aberdeen 2 - 2 HNK Rijeka (agg 5 - 2)

Birkirkara FC 1 - 0 West Ham (agg 1 - 1)

West Ham hi penalty shootout-ah 5-3 in an chak

Linfield 1 - 3 Spartak Trnava (agg 2 - 5)

Shirak FC 0 - 2 AIK(agg 0 - 4)

Alashkert FC 2 - 1 Kairat Almaty (agg 2 - 4)

Debrecen 9 - 2 Skonto Riga (agg 11 - 4)

Dinamo Minsk 4 - 0 Cherno More Varna (agg 5 - 1)

Qabala 2 - 0 FK Cukaricki (agg 2 - 1)

Spartaks Jurmala 1 - 1 FK Vojvodina (agg 1 - 4)

Inter Baku 2 - 2 FH Hafnarfjordur