Muller chelh tum Bayern Munich

Bayern Munich chairman Karl-Heinz Rummenigge chuan Manchester United nena sawi zawm Thomas Muller chu pawisaa hralh phal chi a ni lo tiin a sawi.

Bayern Munich forward Muller chu United-in pound maktaduai 70.5-in lak an tum tih thuthang a awm a, tun dinhmunah chuan English club hi a la zawm mai dawn lo niin a lang.

Rummenigge chuan, "Player ṭhenkhat hi chu an man chhiar theih a ni lo. Muller hi kan hralh chuan kan rilru chian loh vang a ni ang," tiin awlsam taka United lama an player chhuah an tum loh thu a sawi.

Bayern hian pound maktaduai 24.5-in Juventus midfielder Arturo Vidal chu an la lut dawn a, Chile midfielder hian medical test chiah a hmabak tawh. Vidal hi United zawmtu Bastian Schweinsteiger thlak nan Bundesliga champion hian an la lut.

Bayern hian friendly match-ah Inter Milan an hneh hnuin July 23 khan Guangzhou Evergrande chu penalty shootout-ah an hneh lo.