ZoFooty Awards 2015 Aizawl FC-in chawimawina awmte an dawng vek

I League Second Division leh Mizoram Premier League Season 3 champion Aizawl FC-in season ṭha tak an hman zawh hnuah ZoFooty Awards kaltlangin an player-te leh coach chawimawiin an awm.

ZoFooty Awards vawi lina hi June 23 zan khan Hotel Regency-ah neih a ni a, Samsung 3:16 Plan Solution sponsor a ni. Player of the Year-ah Aizawl FC captain David Lalrinmuana chu thlan a ni a, Coach of the Year-ah Aizawl FC coach K. Malsawmkima thlan niin Young Player of the Year-ah Aizawl FC defender Lal­ṭhakima chu thlan a ni bawk.

ZoFooty Awards dawngtute hi Expert Group (40%), Mipui (40%) leh MPL3 club (20%) te thlan a ni a, thlanchhuahte hi Mizoram chhunga khelte an ni. Nominee-te hi season liamtaa an chetṭhat dan a zirin bonus point pek an ni bawk.

Aizawl FC hun

ZoFooty Awards nominee 12 zinga paruk hi season liamtaa Aizawl FC team zinga mi te an ni a, MPL3 champion hian Player of the Year nominee-a tel Lalbiakhlua chu Mizoram Police aṭangin season thar atan an la lut bawk.

Season liamta khan K. Malsawmkima enkawlna hnuaia khel Aizawl FC hi I Day Football 2014-ah pahnihna an ni a, MPL3 final-ah champion lai Chanmari FC hnehin nomawi an chawi bawk.

Aizawl FC player tam zawk khelhna Mizoram team-in National Games-ah gold medal an la a, I League second division-ah an champion zui bawk.

Aizawl FC tan kum ṭha a ni a, ZoFooty Awards-a Mizoram club zinga I League in pet tling hmasa ber an langsar hi a mak lo.

PoTY - David

ZoFooty Awards hmasa ber dawng tawhtu David Lalrinmuana hian expert group, mipui leh MPL club te hnen aṭangin vote a hmu sang ber vek a, nominee dang a teammate Lalramchullova leh William Lalnunfela bakah season thara Aizawl FC zawm tur Lalbiakhlua ten an pha lo.

Zemabawk North midfielder David-a chuan, "A vawi hnihna atana ZoFooty Award dawng thei a min siamtu Pathian hnenah lawmthu ka sawi a, ka inkhelhnaah kawng engkima min support tlattu ka chhungte chungah lawmthu ka sawi bawk," tiin a chhungkua a ngaih pawimawh thu a sawi.

MPL3 best midfielder chuan Aizawl FC leh Mizoram team tana a khelhpui, amah vote-tu mipui, MFA leh ZoFooty chungah lawmthu a sawi tel bawk.

CoTY - Mala

K.Malsawmkima hian David-a ang thoin expert group leh MPL club bakah mipui hnen aṭangin vote a hmu hnem ber a, H. Vanlalthlanga (Chanmari FC coach hlui), Chanmari FC coach thar HC Zarzoliana leh Lalramchuana (Armed Veng) ten an pha lo.

Aizawl FC coach K. Malsawmkima chuan, "Ka lawmman dawn hi Pathian malsawmna a ni. Tin player-te vanga dawng thei ka ni tih ka hria. Club ropui Aizawl FC min enkawltirtu pu Robert a chungah lawmthu ka sawi a,coaching lama bul min ṭan saktu pu RC Khuma (L) te nupa chungah ka lawm em em bawk. Anni vanga hetiang dinhmun thleng thei hi ka ni. Dinhmun sang taka min dahtu Chawimawina hlu tak min petu Football hi ka ngaisang a ni," tiin football hmanga a hmingṭhatna chu a chhuang hle.

Leitan pachal Mala hi ZoFooty Awards 2013 leh 2014-ah te khan nominee-ah telh a ni tawh.

YPoTY - Ṭhakima

Khawzawl Vengthar rawlthar Lalṭhakima hian nominee-a a vawi khat telnaah award a dawng nghal a, India Under 19 camp-a a awm avangin Awards ceremony-ah a tel thei lo.

Young player of the Year-ah hian MPL club-ten Chanmari West FC winger Vanlalbiaa Chhangte chu dah sang ber mah se Mipui leh Expert Group-in ṭha bera an ngaih Lalthakima chu a tluk pha chuang lo. Young Player of the Year nominee-ah hian Aizawl FC winger Brandon VL Remdika leh Chanmari FC forward K. Lalchhanhima te an tel ve bawk.

Aizawl FC defender Ṭhakima chuan, "Football min tuipuia min ṭawiawm reng thintu ka pu H. Lianzuala leh ka pi Romawii, ka nu leh pa leh ka chhungte, Aizawla ka awmna ka putea, Lalhriatrenga te chhungkaw chungah lawmthu ka sawi takzet a ni," tiin ZoFooty Team a hrilh.