I Day Football champion lai Dinthar FC Nomawi humhim tur chuan vanneihna kan mamawh ang - Hluna

Tualchhung football club hlun Dinthar FC hi Mizoram Premier League season 3-ah champion rinkai an ni phak a, MPL4-ah an ni tawh lo.

MPL1 champion Din­­­thar FC hian season liamta aṭangin midfielder Lalmuansanga leh KC Lal­chhuanmawia te chiah an chelh a, mah se MFA regis­tration committee hnuaia an ziahluh player 30 thlirin en­liam mai tur erawh an ni lo.

Squad chu

Dinthar goalkeeper pa­hnih MC-a leh Fela te hi MPL-ah club pahnih tan an inlan ve ve tawh a, team an chhanhim phak loh pawhin defender-te rilru hah phahna tur an ni lo.

CYMA Football leh NECS Cup-a Armed Veng champion puitu MP-a, HPC Cup-a Electric Veng, Lunglei champion puitu Lalhlima te hi an khelh ṭhat ṭum chuan anni aia thlan tur an awm chuang lo ang.

Midfield-ah MPL danin a phal angin Railways-a awm KC-a an ziak lut a, innghahna chi a ni lo. Amaherawhchu Mahuma, Muansanga, Chhaia leh Kolasib lama hming chher tawh Paul-a te an kawl avangin MPL club dangte elpha turin an ṭha tawk.

Tlarhmaah transfer laia MPL club-te inchuh Khawpuimawia an kawl a, tawnhriat nei ṭha Samuel-a an ziak lut leh bawk. Anni bakah hian Lunglei FC tana hming chher Isaac-a leh Aizawl FC indin thar tirh lama khel Tea'n hriselna vanga football khelh a chawlhsan hnuah bul a rawn ṭan ṭha leh dawn bawk.

Head coach thukhawchang

Dinthar FC head coach T. Vanlalhluna chuan, "Tawnhriat nei leh tawnhriat nei chawp tur kan lalut a, kan player naupangte hi loh theih loh thilah hman ngai ta se lungngaia han kunna tur a ni lo. Kan senior-te an thawhrim phawt chuan naupang zawkten entawn tur an nei anga, team ṭha zawk kan nei ang," tiin senior player pawimawhna a sawi lang.

Coaching staff chung­chang sawiin Hluna chuan, "Keini tan chuan thawhrimna hi a pawimawh ber a ni. Kan coach Rem­tluanga te nena kan thawh­hona hi a ṭha em em a, a training a ṭhat bawk avang­in kan inpuahchahna hi chu sawisel tur ka hre lo," tiin training an neih dana a lungawi thu a sawi.

Dinthar head coach hian I Day Football-a champion nawn tur chuan vanneih an mamawh thu a sawi tel bawk. Dinthar hi Chanmari FC, Mizoram Police FC leh Bethlehem VT FC te nen Group A-ah an awm a, July 30 khian an match hmasa berah transfer laia thawm nei lian BVT an hmachhawn ang.