Khabib vs Jones - Tu nge ropui zawk?

Russian fighter rothap Khabib Nurmagomedov-a'n UFC 254-a Justin Gaethje a hneh hnuin a chawlh thu a puang zui a, a ṭawngkam pakhatin UFC fighter ropui Jon Jones a kai tho thung. 

MMA-a fight-a hmachhawna 29-0 record nei thei Khabib hian octagon rap tawh zinga ropui ber anga chhal a phu thu a sawi a, hei hi fight-a neih zawha duhsakna hlantu Jon Jones chuan a ngai thei lo. 

Kum 33 mi Jones chuan, "Khabib-a fan-te zawng zawng hnenah hei hi ka sawi duh. In fighter ngaihsanin world title vawi li a hlawhchhuah theih laiin kei chuan vawi 15 ngawt ka hlawh chhuak thung. 

"Heng zawng zawng hre chung hian fighter ropui berah inpuang a maw? Infiamthu chu a ni ngei ang tiraw? 15 leh pali hi khaikhin chi a ni lo a, in uang a ni em em ang," a ti!

UFC 254-a Khabib-a'n hnehna a chan khan fighter ropui Daniel Cormier chuan, "UFC-a champion ropui ber," tiin Russian fighter hi a fak a, UFC fighter langsar Cody Garbrandt chuan, "He infiamnaa tel tawh zinga ṭha ber," tiin a sawi bawk. 

Khabib-a fan-ten Jon Jones an chhuahchhal a, mahse American fighter a ngawi duh lo. Jones chuan, "Ka lalṭhutthleng luah lai chu a thiltih hmanga min chhuhsak tum loin a dil a, sakeibaknei mutthlu lai chu a kai harh ta a ni," a ti!

Kum 33 mi fighter hian MMA a la chawlhsan ve loh thu sawi lang telin, "Kei chuan hmabak tam tak ka la nei a ni. Khabib hi chuan level sang takah fight-a hmachhawn ṭan ve chauh a, number 10 fighter nena in fight turin min ngaihtuah chhin tawh em?" a ti zui. 

Khabib-a hneh tak Justin Gaethje kha MMA pound-for-pound ranking-ah 10-na a ni a, Jon Jones-a hriat tel loh erawh amah hi pahnihna a ni a, a chunga awm pakhatna chu Khabib a ni. 

Russian fighter hian P4P ranking hi pholangin Jon Jones aia a ṭhat zawk thu a tarlang a, "Mi ṭha tak ka nih avang chauha ka thil duhte hi dawng ka ni lo a, ka nun pum hlana harsa taka ka thawhchhuah a ni," a ti a, Jon Jones-a'n thil ropui tak tih hmaa ropui bera inchhal tum anga a puhna chu a chhang.