MFA-in Inter Village Futsal Tournament buatsaih dawn April 30 aṭangin MFA Futsal League Season 3

Mizoram Football Association chuan Mizoram khua leh veng hrang hrang futsal inelna, Lalmalsawma Memorial MFA Inter Village Futsal Tournament 2020 chu February 18, 2020 hian a buatsaih dawn.

MFA Futsal League Season 3 chu April 30-a khelh ṭan turin MFA Futsal Committee chuan a rel a, MFA-in Aizawlah Santosh Trophy a thlen dâwn avangin futsal league khelh hun hi an sawn hla.

Futsal khelhna hmun a tam zel a, MFA chuan futsal hmanga veng leh khua futsal inelna lian tham Lalmalsawma Memorial MFA Inter Village Futsal Tournament a buatsaih dawn. Inelna hi February 18 aṭangin Malsawma's Yard, Durtlang Leitan-ah khelh ṭan a ni dawn a, Village Council/Local Council tin aṭangin team pahnih zel tel phal a ni ang.

Futsal khelmual Malsawma's Yard hi he tournament hming chawitu Lalmalsawma (May 29, 1963 - September 19, 2018) puala a chhungte siam a ni January 28 - February 7, 2020 chhungin MFA Office, City Park-ah  team khat tan entry fee Rs 1,000  thehluh theih a ni ang.

Champion-in Rs 70,000 + trophy an dawng ang a, pahnihnain Rs 40,000 dawngin semi finalist-ten Rs 10,000 ve ve an dawng ang. Team tel turin Village Council/Local Council hriatpuina an neih tel a ngai dawn a; player tel duh an ṭhahnem deuh ṭhin avangin VC/LC pakhat huam chhung aṭangin team hnih tel phal a ni.

Player-in Voter ID a neihna khua/vengah an khel tur a ni a, an khua/veng an chhuak lo a nih chauhin a awmna veng/khua (present address) ah a khel thei ang. Team tel dan a zirin chhun leh zan lamah khelh tura ruahman a ni a, quarterfinal aṭangin Zonet Cable TV-ah live telecast-a pekchhuah a ni ang.

MFA Futsal League Season 3 chu April 30 aṭanga khelh tura ruahman a ni a. MFA Futsal League-ah hian team 16 an awm a, season hmasa ber hi kum 2019 khan khelh ṭan niin Chhinga Veng chu champion hmasa ber an ni.

Season hmasa ber hi R. Dengṭhuama Hall-ah khelh a ni a, nikum Ferbruary - March thla chhung khan Electric Veng YMA Indoor Stadium-ah season 2 khelh niin Chanmari Zothan Futsal an champion.

May thlà chawlkar hmasa berah Division One leh Veteran Season Ending Futsal Tournament khelh a ni dawn. Division One hi MFA Futsal League hnuai chiaha awm a ni a, season khatah inelna pathum awmin Season Ending hi a tawp kharna tur a ni.

MFA Inter Village Futsal Tournament leh MFA Futsal League atana inbuatsaihna ni pah fawmin MFA Futsal Referee Training chu February, 2020 chhung hian buatsaih a ni dawn a; hetah hian Futsal Referee ni sa leh ni thar duhte tán training/clinic neih tur a ni. Asian Football Confederation hnuaia Futsal Referee Instructor leh Refree training chhuakten an zirtir ang. Hre chiang duh tan phone number 9862647664 ah zawh fiah theih a ni.