Europa League Arsenal leh Arteta tan fiahna

Beisei anga season hmang ṭha rih lo Arsenal leh an manager Mikel Arteta te chuan zanin dar 1:30 hian Europa League khel turin Dundalk an mikhual dawn, an insiamrem thei ang em tih chu zawhna lian tak a ni.

Premier League club Leicester City chu AEK Athens mualah an lenglut thung dawn, manager Brendan Rodgers naute erawh league lama Arsenal hneh hlim an nih avangin an boruak ṭhat lai tak a ni thung. Tottenham Hotspur-in zanin dar 11:25-ah Antwerp an tlawh bawk ang.

Europla League group stage chinah chuan Arsenal tan chuan player naupang zawk chhawr chunga chak mai theih tura ngaih a ni a, mahse a ni ngawt lo. Rapid Wien an tlawh ṭumin an tlawm teuh hle, hun tawp dawn lamah David Luiz hmanga si phurh an sut hnuin Pierre-Emerick Aubameyang chuan chakna goal a khung hram.

Zanina an mikhual tur Dundalk nen hian tun hmain an la intawng ngai lo a, Irish club hian English club an la hneh ngai lo - tun hmain Tottenham leh Liverpool hmachhawn tawhin an tlawm, zaninah pawh rinkai lo zawk an ni ang.

FA Cup an chawi avangin Arteta-a'n fak a hlawh a, season kal laia a naute a khelhtir danah erawh fans an lungawi lo. Zaninah goal tam zawk an khung thei lo leh a nih chuan North London club ṭantute lungawi lo ri a ring tawhin a rinawm.

Premier League season kal laiah Arsenal hian match ruk aṭangin goal sarih an chhuah a, anni aia chhuah tlem an awm lo! Mahse table-ah 11-na dinhmun an luah avangin goal chhuah tlem vang ngawta lawm tur an ni lo.

Foxes an hneh loh ṭumin defender rinrawl Luiz a inhliam a, a dinhmun a la chiang lo. Tlarhnung laiah Shkodran Mustafi leh Gabriel Magalhaes an din a rinawm a, a ṭul chuan Sead Kolasinac a la awm bawk.

Spanish manager Arteta-a'n Sokratis leh William Saliba te chu squad-ah a telh lo a, beiseina sang tak nena an lak luh Saliba hi insiamrem a la ngai niin a sawi. Luiz awm loh kara tlarhnung a pherh zui a nih chuan manager hian boruak rit hmachhawn a inhuam a ngai dawn.

Zanin dar 11:25 hian Leicester City chu AEK Athens mualah an lenglut dawn, team pahnih hian European football bikah sulhnu ropui sawi tur an ngah loh avangin chak zawk tur rinthiam a harsa.

Athens Olympic Stadium-ah AEK hian European football a mikhual an thlen hnuhnung 12 zetah chak ni hmel an hmu lo, an mikhual tur Foxes hi khualmuala vawi thum an len chhuahah ṭum hnih an tlawm ve bawk.

English club manager Rodgers tana lawmna tur erawh Jamie Vardy a dam tawh hi a ni, hliam vangin Wilfried Ndidi leh Ricardo Pereira te la chhawr thei dawn lo mah se Arsenal lakah goal awmchhun khungtu Vardy a dam tawh avangin chak an tum ang.

Europa League group stage zingah chuan Napoli leh Real Sociedad inkhel tur hi a hmuhnawm tur zinga mi a ni ang, season bul ṭan fuh leh player ṭha awmna an nih avangin chak tur pawh rin thiam a harsa.

Gennaro Gattuso naute hi Serie A champion tum ngam zinga mi an ni a, an mikhual tur Sociedad hi Barcelona leh Real Madrid te awmna La Liga hmahruai mektu an ni thung - an nep lo dun viau.

Manchester City captain hlui David Silva chu Sociedad tan a inlan thei dawn, Spanish midfielder hi a kum tam deuh tawh mah se a thiam a la theihnghilh lo - tlarhnung phui vanga fak hlawh Napoli leh La Liga goal khung hnem ber ni lai Sociedad inkhel tur hi a hmuhnawm ang.